شو رايكم في هذي الوجبة

[M a Y e D]

السلام عليكم ورحمة الله وبركاته

شخباركم جماعة الخير ....

طال عمرك حبيت اخذ رايكم في هذي الوجبه اللي اقدمها لحنفي وامون وهم كاسكوين (ذكر وانثى)، والوجبه اقدمها لهم على فترتين صباحية ومسائية، وهي تتكون من:



1- تفاح
2- برتقال
3- جزر
4- طماطم
5- خس
6- ذرة
7- بازيلا
8- عنب
9- قصب السكر

مثل ما هو واضح في الصوره اعلاه، الحين السؤال اللي يسدح نفسه ، هل الوجبه هذي مفيدة لهم، وهل زين اني اعطيهم على فترتين والا على فتره وحده؟، مع العلم اني اعطيهم حب شمسي بكميه بسيطه فتره الظهر وهم يطالعون التلفزيون

وهذي صورتهم وهم يضربون بالخمس من الصحن



الشي الثاني امون دووووم تتغلى على حنفي يعني بعض الاحيان لما يقرب منها تتضارب معاه وبعض الاحيان عادي، وبعض الاحيان من تشوفه تنزل راسها تباه يحك راسها بس هو ولد ثقيل ما يسويلها سالفه ويخلي نفسه ولا كأنه شايفينها ، مع العلم انه كل واحد منهم في قفص بروحه بس جنب بعض يعني عادي كل واحد منهم ينتقل للقفص الثاني والعكس (عيب اخليهم مع بعض لانهم في مرحلة خطوبة لين يعرسون بعدين بنقلهم لقفص واحد ) ، الحين هل هالتصرف طبيعي والا لا ؟؟؟

وهذي بطاقتهم الشخصيه:

حنفي :

العمر: تقريبا 7 الى 8 شهور

النوع: كاسكو جامبو

الحالة الاجتماعية: مخطوب لامون

أمون:

العمر: 6 الى 7 شهور

النوع: كاسكو جامبو

الحالة الاجتماعية: مخطوبة لحنفي بس تتغلى عليه

[To zoo]

والله شكلها يشهوي

اشتهيتهااااااا بالعافيه عليهم

واحسها مره مفيده لهم والاحسن على فتره وحده يعني المغرب

والصباح والليل حط لهم الحب الشمسي

الله يخليهم لك

[M a Y e D]

المشاركة الأصلية كتبت بواسطة To zoo

والله شكلها يشهوي

اشتهيتهااااااا بالعافيه عليهم

واحسها مره مفيده لهم والاحسن على فتره وحده يعني المغرب

والصباح والليل حط لهم الحب الشمسي

الله يخليهم لك

مشكور اخوي على مرورك الكريم واذا خاطرك فيه بطرشلك صحن

تسلم وما قصرت

[ابو شما]

ليتني داز ويهي وياهم واضرب بالخمس

[M a Y e D]

افا عليك يا بوشما اقرب الخير زايد

[عاشق ببغاء الدرة]

بالعافية لا بي العكس الأكل مرة مفيد بس تخيل كل يوم غدائك وعشائك وفطورك كبسة أو بخاري أو أي شيء ما تتقرف يعني نوع يوم كذا و يوم كذا
وأنصحك إنك لا تديله الفلفل بي كثرة لأنه يجيب الإسهال للببغائك يعني أديلهم مرة في الأسبوع

[الببغاء الافريقي]

صراحه انا اقترح عزلهم عن بعض ما يشفون بعض نهائيًا لمدة يومين وبعد يومين حطهم بغرفه وحده وصور فديو وخلينا نشوف الفديو علشان كل واحد يعرف قدر الثاني (فلم رومانسي ) ههههههه ومن ناحية الطبخه حقكك هذي اتووقع تجيب لهم الاسهال وانت بكرامه لان مرتين باليوم كثير مره لازم ياكلون نواشف مو فواكه علشان كذا قترح تخليها كل يومين ولا تنسى الفلم الي قلتلك صوره

[M a Y e D]

المشاركة الأصلية كتبت بواسطة عاشق ببغاء الدرة

بالعافية لا بي العكس الأكل مرة مفيد بس تخيل كل يوم غدائك وعشائك وفطورك كبسة أو بخاري أو أي شيء ما تتقرف يعني نوع يوم كذا و يوم كذا
وأنصحك إنك لا تديله الفلفل بي كثرة لأنه يجيب الإسهال للببغائك يعني أديلهم مرة في الأسبوع

حياك الله اخوي عاشق الدرة

ويا ريت يكون غداي وعشاي كل يوم كبسه ومندي وبخاري ومضغوط لاني اعز الرز كثير

وبالنسبة للفلفل انا ما اعطيهم فلفل.

[M a Y e D]

المشاركة الأصلية كتبت بواسطة الببغاء الافريقي

صراحه انا اقترح عزلهم عن بعض ما يشفون بعض نهائيًا لمدة يومين وبعد يومين حطهم بغرفه وحده وصور فديو وخلينا نشوف الفديو علشان كل واحد يعرف قدر الثاني (فلم رومانسي ) ههههههه ومن ناحية الطبخه حقكك هذي اتووقع تجيب لهم الاسهال وانت بكرامه لان مرتين باليوم كثير مره لازم ياكلون نواشف مو فواكه علشان كذا قترح تخليها كل يومين ولا تنسى الفلم الي قلتلك صوره

لا فيلم رومانسي ولا مسلسل تركي، بيتزوجون يعني بيتزوجون نحن ما عدنا بنات يمشن شورهن علينا

ان شاء الله يا عاشق الافريقي بحاول اجرب معاهم هالشي وبنشوف شو بيصير

وبالنسبه للاكل فرايكم حلو وبجربه ان شاء الله بس عاد يوم بعطيهم فواكه وخضروات ويوم معكرونه ويوم بيض وهلم جره

[عاشق وتر]

مشاء الله عليك يا مؤيد

ألحين نادري الي يعتني في طيوره بهاذي الطريقة

أحس أنك مهتم فيهم الله لايغير عليك أنشاء الله

ليكون توك شاريهم ومتحمس بس هذي اليومين وبتبطل هذا العاده ؟؟؟

الله يخليهم لك ويخليك لهم أنشاء الله