فرخي الكاسيكو يرجع

[دموع العين]

السلام عليكم اعضاء المنتدى الكرام،،

بصراحه صار لي تقريبا اسبوعين الا خمسة ايام من خذيت لي فرخ كاسيكو للحين ياكل بالإبره ..
بس هو عمره تقريبا في حدود ال4 الى 5 شهور

اول ماخذيته واغره غر كان عادي ومايرجع شي ،، بس الحين الاحظه اذا اخلص من غره يرجع شوي مرتين او ثلاث ويعتمد ،، مره واااايد ومره ترجيع بسيط ..

شنو السبب؟ وهل هذي الشي خطر عليه؟؟

[يوفاوي الكويت]

في البدايه مبرووووووووووك علي الطير

بس انا اتوقع انه طبيعي

لانه ياكل كمية الاكل وبعدها يستفرغ الزايد من الاكل

حاول تنقص الكمية وتشوف اذا رجع او لا

[دموع العين]

الله يبارك في حياتك،،
مشكور اخوي على الرد وعلى فكره انا بنت
بس يوم كان عند صاحبه الاولي كان يعطي وايد لدرجه ان بطنه يكون منتفخ وااايد،، بس انا اعطيه ينتفخ شوي بس وبعد يرجع شوي

[صوغة]

مبروووك عليج الطير

والله يحفظه لج

شوفي اختي كان عندي فرخ كاسكو وعاش معي 20 يوم وصار وزنه ماشاءالله وخلال يومين استفرغ ومات

قبل لايموت بساعات اخذته لبيطري قالي جسمه كله دود

انهار فجأة ومات بعيد الشر عن طيرج

نصيحة خذيه لبيطري خاصه اذا عظمة الصدر بارزة ماراح تخسرين شي لاخذتيه

نصحني أحد الاخوان بأول يومين اشتريه فيه أعطيه مضاد او طارد للدود وما سمعت نصيحته وكانت غلطتي

اتمنى ما تتأخرين في حالته اخذيه منتي خسرانه شي

والله يحفظه لج

[الكاكي]

المشاركة الأصلية كتبت بواسطة صوغة

مبروووك عليج الطير

والله يحفظه لج

شوفي اختي كان عندي فرخ كاسكو وعاش معي 20 يوم وصار وزنه ماشاءالله وخلال يومين استفرغ ومات

قبل لايموت بساعات اخذته لبيطري قالي جسمه كله دود

انهار فجأة ومات بعيد الشر عن طيرج

نصيحة خذيه لبيطري خاصه اذا عظمة الصدر بارزة ماراح تخسرين شي لاخذتيه

نصحني أحد الاخوان بأول يومين اشتريه فيه أعطيه مضاد او طارد للدود وما سمعت نصيحته وكانت غلطتي

اتمنى ما تتأخرين في حالته اخذيه منتي خسرانه شي

والله يحفظه لج

كلام سليم 100%
الا الفروخ مافيها تهاون

[دموع العين]

مشكوره اختي صوغه على النصيحه
سويت نصيحة الاخ اللي قال لي ان اخفف الاكل اللي اعطيه اياه وفعلا ما رجع الطير ..
بس اذا جفت هالحاله اتصيده وايد ان شاء الله بوديه البيطري مثل ماقلتي اختي

[fawzi]

اختي هناك عده اسباب تخلي الطير يستفرغ ومنها الزياده في الاكل والي تكرم وقالها الاخ يوفاوي الكويت والسبب الثاني ونادر مايحصل انه يدخل هواء داخل حوصله الطير واسبابه بعض الاحيان تكون ابره الغر .برضو الاكل اذا كان درجه حراره متغيره يعني يكون صارله فتره يمكن يصير بارد ويستفرغه الطير او يكون حار زياده عن اللزوم ومايتقبله الطير طبعا هذه نادر ماتحصل وبعض الاحيان برضو الاكل يتغير عليه بعض الاحيان برضو يكون مريض بس الافضل كي تطمئني عليه وديه للبيطري خليه يكشف على الطير

[دموع العين]

اهلا اخوي شكرا على الرد،، انا مااعطيه من نفس الاكل في الابره،، اذا زاد اغسل الابره والمره الثانيه اسوي واحد غيره ،، والاكل اللي اعطيه في الابره اشحنه تقريبا 40 مل بس،، وبطنه عقب الاكل مايكون منتفخ الا انتفاخ خفيف كلش،، عكس يوم كان عند صاحبه الاولي ..

وبغيت اسأل بعد ،، شلون يكون الاسهال؟؟
لان شاكه ان وياه اسهال بعد ،، بس مو متأكده

[هاوي قطه]

يعني اذا كانت عظمة الصدر واضحه يكون فيه دود ولا كيف ؟؟

[صوغة]

اوكي حلو الله يحفظه لج

والاسهال اعزك الله يكون فضلاته سائله الاخضر يكون سائل بس مع السيريلاك اعتقد طبيعي يكون نوعا ما سائل ..

وبالنسبه لسؤال الأخ هاوي قطة اي اذا كانت عظمة الصدر بارزه وحادة اتحسها قاصه الريش يكون فيه خلل بالمعدة يكون فيه دود والدود يقضي على أكل الطير والطير مايستفيد شي

ونصيحة الي شاك انه في شي بطيرة وهو أول مره يربي طيور يلجأ للبيطري ومع الوقت تتكون الخبرة ويستغني عن البيطري ..