كيف اجبر الطير على الاكل

[المسافر777]

بسم الله الرحمن الرحيم


السلام عليكم

كيف حالك اخواني إن شاء الله تكونون بخير وعافية

اخواني انا عندي عدة انواع من الطيور كاسكو سنغالي كوكاتو درة والباقي بالطريق إن شاء الله

وبصراحه مدلعهم اخر دلع مع ان الكاسكو عندي منه اثنين ومايستاهلون الدلع لانهم وحوش ههههه

مابقى شئ ماشريته لهم عشان احافظ على صحتهم
والغذاء حقهم مكون من
حب شمسي احياناً يكون لحاله واحيانا اخلطه
بندق جوز كاجو فستق لوز نخي سبال ( فول سوداني ) وهذي التشكيلة احطها مع حب شمسي
اشتريت الخلطه الي تجي في الكرتون _ والله انها ولا بريال نصابين ثلاث ارباع المكتوب ماهو موجود وما انصح احد يشترية
تمر
خضار مثل الطماطم الجرجير الخس الفلفل الحار الفلفل البارد خيار جزر كزبرة بقدونس حبق نعناع
فواكه مثل التفاح الاخضر والسكري موز برتقال جح ( حبحب ) شمام كرز ( يموت فيه الكوكاتو ) خوخ مشمش كمثرى
وسويت لهم خلطه عبارة عن فول وماش وفاصوليا وعدس ( اعتقد انهم يحبونه ) بليله وهذا كله حب ني غير مطبوخ واخلط معاه حب شمسي
يجماعة شفتوا الي كتبته فوق

ثلاث ارباعة الطيور ماتاكله
وخصوصاً ريكو الكاسكو هذا جوعته حوالي يوم وشوي وعطيته طماط وخليتها عنده حوالي يوم وما اكلها لدرجة اني حسيت ان الطير بيغمى عليه من الجوع ومع هذا ما اكل الطماطه
الجرجير احطه الين ينتهى محد لمسه الفلفل الحار ما ياكله الا الكوكاتو والدرة قليل والباقي محولك احد السنغالي تقدرون تشيلونهم من الحسبة لانهم شبة ياكلون كل شئ
الخس احط جديد نظيف مغسول واشيله مثل الورق ذابل ويابس ماكلوه
الخيار اغلب الاكل الي احطه ما يكلونه مع اني اتبعت سياسة التجويع بس محولك احد
حتى الرز حطيته لهم ومثل ماحطيته شلته
التمر اكلو منه ونسيته فترة ولما رجعت حطيت لهم محد لمسه
قطع الدجاج احط لهم قطع الدجاج وتبقى الين تجف وتيبس ومحد لمسها غير الكوكاتو ياكلها احياناً

الحين انا قصرت معاهم بشئ ههههههههههههه
كل شئ سويته لهم ومع هذا الطيور مو راضية تستجيب وتاكل الاكل الي احطه مع اني احرص احط لهم الاكل النضيف والجديد واشيل الخربان خربان تعبان نص نص هذا كله ممنوع

وفيه شئ ثاني في موضوع عن الاكل للبغباء مكتوب اني ااكلهم نوع من الحبوب اسمه ( الفلارس ) وهذا عجزت ادورة لفيت اغلب محلات الطيور لما اقولهم عنه يتعجبون وينحاسون يا جماعه هذا له اسم ثاني غير هذا الاسم وهل هذا النوع خاص لنوع من الطيور لان فيه اكل اعتقد الكناري يشبه واذا سألتهم هذا ياكله البغبغاء يقولون مستحيل فإذا احد يعرف اسم ثاني له او محل في الشرقية يبعه يعلمني

شباب اذا احد عنده ملاحظه على الاكل او فكرة او يشوف فيه نقص يقول عادي ماني بزعلان ...

[كاسكوه]

ماشاء الله تبارك الله باين عليك مهتم بطيورك

بس ليه تجوعهم ؟ ويوصل التجويع ليوم عشان ياكلون ؟
انا ماني خبيره بس لو كنت مكانك باحط الاكل عندهم واخلييه خصوصا الحب والفول السوداني والحبوب بانواعها

بالنسبه للخضار يمكن بعض الانواع ماتعجبهم والله اعلم زي طيري مايحب الطماط

موفق

[الببغاء الافريقي]

فيه سياسة اخرى وهي سياسة التقليل <<وش هل الاسم البايخ
باختصار قلل كمية الحب الشمسي لانهم متعودين عليه قلل كميته حط صحن فيه كميه قليله شوي على الطير وحط اشياء ما تخرب علشان مته ما بغاء ياكل وجرب قصب السكر يحبوننه حب مو طبيعي

[ابوخاالد]

ياخوي اعتقد كل الاكل اللي تحطه لهم ماله داعي او فيه بدائل له

الجرجير وش لزمته للكاسكو ؟؟؟

الفلفل الحار من قالك ان الكاسكو ياكله ؟؟ تبي تجيه قرحه ؟؟ بكيفك


خذ مني
الكاسكو

تفاحه مره بالاسبوع لاتتجاوز النص او حتى لو خليتها بحجم الاصبع عادي وتكفيه وتفيده باذن الله

الذره اسلقها .. نص ذره .. وان ماكلها نزل حبوب الذره وكلها انت وعطه الباقي وشف وش بيسوي فيه بيفرمها فرم

قطعة برتقاله صغيره مره بالاسبوع

الفول السوداني لاتكثر .. يكفي حبتين باليوم ولو تخليها مكافآت يكون افضل

ومثل ماقال الببغاء الافريقي ...

لاتعبي صحن الاكل حقه

حط شي بسيط وبعد اربع ساعات شوف اذا كان مخلص .. نظفه وحط قطعة تفاحه

او الاكل اللي ماكان ياكله واتركه

والخس الكاسكو يحب الجزء اليابس فقط


ماشاء الله عليك ماناقص الا تقدملهم استيك وتقلّطهم على مفطح

[Najomallyl]

ماشاء الله تبارك الله باين عليك مهتم بطيورك

[الببغاء الافريقي]

صح نسيت اقولك علق بعض الاكل بالقفص فوق لان الببغاء قيه لقافه حط قطعت تفاحه بينن حدايد القفص فوق وممكن تعطيه بيدك اليف ممكن ياكل

[2zo-o]

الكاسكو

يحب النعناع

[fawzi]

اهلا اخوي اسمحلي الي كل انت تعمله غلط في غلط والمشكله الكبير انك غلط تجوع الطير انا عندي مجموعه من الطيور كاسكو اثنين وماينا وحده عارف ويش اسوي اقلل الاكل لهم اشتري الخلطه يبعونها في محلات الطيور كل شيء فيها حتى فواكه مجففه وفيتامين .اما عن الفواكه علق نصف تفاحه في القفص منزوعه البذر او كمثرى او عنب موز لاتحطله حطله اناناس فراوله هذه كلها البغبغاوات تحبها والمانجو في مجفف حتى الاناناس فيه مجفف واذا ماتحب تعلق قطع الفواكه قطع صغيره مكعبات واخلطهم مع الاكل وغلط انك تاكله فلفل هذه خطر على الطير يسبب نزيف داخلي اذا انك صحيح تبقي تهتم بالطيور الي عندك طلعهم معاك بره ودهم حديقه ودهم البر وشوف الفرق بعدين هذه الي يسمونه الاهتمام :تحياتي لك وتقبل مروري

[المسافر777]

كاسكوه مشكورة على الرد

التجويع احد اساليب الترويض والتعويد على نوع معين من الاكل بس فشلت معاي هههههههههه ...

[المسافر777]

البغباء الافريقي مشكور على الرد

قصب السكر احط لهم وهذا نسيت اذكره وفعلاً شفتم ياكلونه اغلبهم عد ريكو ماني متاكد كان ياكله والا لا والكاسكو ياكل قصب السكر بطريقة حلوه عكس الكوكاتو الي يعفس ام المكان ههههههه والسنغالي بعد يكله بطريقة زينه
سياسة تقليل الاكل اتبعتها ولازلت اذا حسيت ان البغباء طول وما اكل حطيت له كمية قليله من الحب الشمسي عشان مايفقد الوعي ههههههههههه الا ان البغباء مصر انه ماياكل ولا شئ عدا الحب الشمسي والسبال ...