..؛ ( تحذيــــــــــــــــــرر ) ؛..

[sisi_moon]

مـرحبا هــــــوااهـ القطط ..

بقولكم سالفه صارت لي .. وياليت الـكل يــــاخذ حذرره

انا قبل 10 ايام تقريبا .. شريت قطوه شيرازيه .. عمرها شهرين ونص تقريبا .. حيل حلوه وكيوت وطباعها تجنن ربي يخليها لي .. سميتها إيمـا

ماعلينا ..

إيما قبل كم يوم .. جاها زكام لكن الحمدلله خفيف .. ما أثر على شهيتها للأكل او نشاطهاا

قبل أمس رحت باخذ لها المضاد الحيوي ( دوكسيسيروب ) من الصيدليه البيطريه الي دايم اتعامل معها لكن الي كان هناك مو البيطري الي أثق بخبرته ودااايم استشيره

دوكسيسيروب أحسسسسن مضاد حيوي جربته .. روعه روعه روعه .. وتكلمت عنه بهالموضوع

..." doxysyrup "...


المهم .. قالي المضاد هذا حاليا مخلص .. ومافي منه بالسعوديه احنا نجيبه من البحرين .. قلت له طيب فيه بديل .. ؟ بس غير المضاد بيتاموكس .. لان هالمضاد بصراحه ماحس له ذاك التأثير والفايده

قالي بكتب لج مضاد حيوي وخذيه من الصيدليه البشريه .. انا هنا ترددت لاني سامعه ان المضادات الحيويه البشريه مو زينه للقطط .. بس هو قام يمدحه لي كثيييير

المهم رحت الصيدليه و أخذته .. رجعت البيت .. مو مطمنه له .. بعدها كلمت البيطري نفسه الي كتبه لي .. قلت له مو مرتاحه لهالمضاد .. خايفه يأثرر عليها .. قالي لالالا احنا جربناه لكثير قطط وكلاب وعطانا نتائج ممتــــــازه ورهيبه ومادري ايش .. قلت له اوكي

ما أعطيته لقطوتي على طول .. أبد مو مرتاحه له .. الفجرر .. قلت يلا هو بيطري وأدرى مني ويمكن الكلام الي سمعته مو صحيح .. خل أعطيها منه

وعطيتها تقريبا مرتين او ثلاث ..

الي صـار .. أمسس شفت عالأرض شي لونه بني فاتح على أصفرر .. قوامه وشكله وريحته مو فضلات .. فـ قلت يمكن مستفرغه

بعدها بكم ساااعه .. وانا أنظف اذنها .. حسيت برطوبه على يدي ..شفت نفس الشي الي شفته عالارض وطالع منها من منطقه الإخراج تكرمون .. بس شكله مو براز مادري الصراحه شنو .. وماله ريحه .. قمت غسلت أيدي ونظفتهاا .. وقلت يمكن معها ليونه وانا يوم انظف اذنها ضغطت على بطنها وماتحملت وووسخت .. كل شي جاايزز

بعدها بكم ساعه برضو .. حطيت لها أكل وكانت تاكل .. يوم خلصت أكل رحت شلتهاا .. لقيت نفسه الشي متعلق فيها عند منطقه الإخرراج ..

اكتشفت ان هالشي يطلع منها لا إرادي .. لانها ماتوسخ الا بحمامهاا ومامعها اسهال عشان توسخ برا .. اصلا حتى هي .. من شكلها باين انها مو حاسه فيه

قلت خلص الى هنا ويكفي .. وطووالي شكيت بالمضاد .. وماعطيتها منه

اليوم الصباح .. نزلت ماما وشافت نفسه الشي عالأرض

عاد المساء اليوم كلمت البيطري الي أنا دايم استشيره وقلت له عالي صار

قالي ان إيما تحسست منه .. واصلا المضادات الحيويه البشريه كثير قطط تتحسس منها .. ولازم قبل ماتنعطى ينعمل لها اختبار حساسيه وشغلات كذا ..

يعني سبحان الله الي خايفه منه صـاار .. والكلام الي سمعته صحيح

وعلى فكره انا كنت ناويه اول مارجعت البيت من الصيدليه اني اكلم هذا البيطري أخذ رايه .. بس كنت متفشله لاني حسيت الفتره الأخيره كثير أزعجته .. بس ليتني خليت الفشيله على جنب وخذت رايه قبل ما أعطيها منه

بس الحمدلله هي صحتها تمام التمام وما أثر عليها الا بهالشي فقط .. ولا نشاطها وشهيتها كلو تمام ..

عذراً عالإطاله بس حبيت احذرركم لان فيه اعضاء مهما نحذرهم من شي يظلون يستخدمونه ..

الله معكم ..

[بنووووته]

مشكوره على التنبيه
والله يحفظها لك

[دلع ولع]

تسلمي سيسي مون حبيبتي على التنبيه
جزاكي الله خيير

[almoez]

شكراً جدا علي هذا الموضوع

ولكن في مصر اروح لدكتورة بيطريه كل الادويه اللي عندها تقريبا للبشر..

يعني مثلا مرة رحت ليها قطتي ذا اليوم كانت تجهض..

المهم في صيدله بشريه جنبها تقريبا ..راحت الدكنوره متصله بالصيدله البشريه لتوصيل دواء معين لها لاعطائها لقطتي..!!

المهم الحمد لله القطه صارت بخير بس انا حاسس انها ممكن لاتحمل تاني..

[الكلاسيكي]

مرحبا اختي sisi_moon

يعطيتس العافية على المعلومه الطيبه ..

ماقصرتي خيتوو ..

وبإذن الله تقوم بـ السلامة وتشوفينها تنطط في البيت ..

الأيام هذي مشهوره في الزكام للقطط ..

انا نفس الشيء ..

شريت قطه قريب واهي الوحيده فيهم صابها الزكام ..

وطعمتها وعطيتها مضاد الخاص تبع الحيوانات ..

ولها 5 ايام ولحد الأن تحسن قليل ..

وعلى الله ..

ومشكووووووره على التنبيه ..

[! هاويه الطيور !]

جزاج الله الف خير سيسي

والله انا مابي اقول كل الدكاتره مو زينين او خبرتهم حي الله


بس احب اخذ العلاجات الي معروفه حيل بين المربين ماحب استخدم اي شي كـ تجربه يمكن يكون له سلبيات وضرر كبير

بس دايما الخبراء والي لهم فعلا حب للحيوانات اهما الاجانب < الحمدالله الدكتور الي اتعامل معاه ماشاء الله عليه

وفي مصاروه ماتعامل معاهم لانه شغلتهم الابل والاغنام ماظن يبي يعرف القطاوه ويمكن يقولي اي كلام وخلاص

الاجنبي لا غير


.
.

بخصوص الزكام كان سويتي الطريقه العلاج المنزلي افضل واذا مافاد تدورين العلاج المعروف doxysyrup

يعني البخار الماء اهو الي يفتح الشعب الهوائيه لها



والحمدالله وصلت على جذي ولحقتي عليها وماتشوف شر إيمآ

ومشكوره على التحذير وياليت الكل يستفيد منه

[sisi_moon]

بنوته .. دلع ولع

تسلمون حبايبي عالرد ..

almoez

فعلا كثير من علاجات القطط تكون من الصيدليه البشريه

مثل قطرات التعقيم للإذن والعين .. وبعض قطرات الأنف .. والحبوب والكريمات والمراهم والشامبو وو .. وكلها ممتازه جداا للقطط .. انا كلامي خصيت فيه المضادات الحيويه فقط .. هي الي أغلبها لها نتائج عكسيه لان القطط تتحسس منها ..

وان شاءالله قطوتك تحمل مره ثانيه وتجيب أحلى كيتينز

سلمت اخوي عالرد

الكلاسيكي ..

هي الحمدلله زييينه وطابت لان الي جاها خفيف جدا .. وحتى يوم هي مريضه دومها تنطط وتلعب .. الحمدلله يارب

والله يشافي قطووتك .. وجرب معها بخار الفكس .. نفع إيما حيــــــــــل .. حتى يوم اعطيها المضاد كانت تقريبا متشافيه لكن باقي فيها بعض الأعراض الخفيفه من الزكام مثل إدماع العين وسيلان عند الأنف .. والحمدلله الآن بأحسن حال .. وان شاءالله انها ماتخررج مثل هذاك الشي مره ثانيه

سلمت اخوي عالررد

هاويه ..

اي صحيح كلامك حتى البيطري الي وصف لي هالمضاد .. جربت منه علاجات للإذن و علاج للإلتهاب عند منطقه الإخراج .. وبصراحه علاجاته تجنن .. بس مع هالمضاد فشل ..

وصحيح الأجانب عندهم اهتمام بالحيوانات أكثررر من العررب ..

وزي ماقلت لاخوي الكلاسيكي .. انا جربت معها بخار الفكس .. والصراحه نتايجه روعه ماشاءالله من بعدها خف العطاس بالذات وصارت تعطس طبيعي يعني مره او مرتين بس .. مو زي قبل عشر طعش مره ورا بعض

سلمتي حبيبتي عالررد

[BaDeR KhaLiD]

sisi

طيب اناا بساسي فيهم زكمه عمرهم 20 يوم ..


تطلع مخاطين من خشومهم كذا زي السعابيل . :>


وش اسوي اوديهم البيطيري بس هم لسه ورعااان

[sisi_moon]

بدوري

مساكين شكله فيهم شديد شوي

حالياا قوم سو لهم بخار الفكس

حط ملعقه فكس في قدر فيه ماي وخليه عالنار لين يغلي ويكون مغطى عشان البخار مايطلع برا .. وبعدين وده الحمام وسكر النوافذ والباب .. وجيب القطاوه .. شيلهم بيدك .. وقربهم عند القدرر بس مو مررره .. لا .. و بعدين بعدهم شوي .. ( انا كنت لما أقربها أقرب وجهي وياها عشان اشوف درجه الحراره محتمله او لا ) وارجع قربهم شوي وبعدهم وكيذا .. وبتلاحظ تحسسسن

ومن بكرا روح للبيطري قوله يعطيك أدويه مناسبه لعمرهم ..

الله يخليهم لك ياارب

[BaDeR KhaLiD]

اناا بوديهم الصبح الساعه 9


تتوقعين يتحملون ؟