أسأله تحتاج اجوبه لمبتدأه في الهامستر..؟؟

[passposse]

السلام عليكم ..

اولا قبل ان أسال انا عضوه جديده تبحث عن مرشد في عالم القوارض ..

ثانيا اشكركم جزيل الشكر ع هذا الموقع القيم والقائمين عليه ..

ثالثا طبعا وبعد قراءة معظم المعلومات عن الهامستر وازدياد رغبتي لتربيته ..

لو سمحتوا اذا احد يعرف مكان جيد لشراء منه الهامستر في أبوظبي يعطيني المساعده ويدلني ع مكانهم واذا كل معداته احصلها في هل مكان من دون ما انتقل من مكان لاخر .. ارغب باقتناء النوع الجيد منه ..

وممكن كمبتدأه اني اربي نوع شفته في المواضيع وهو Campbell Russian .. هل هو اجتماعي وسريع التعلم ..

ممكن تصير مشكله لو ربيته وعندي قطط بالبيت وكلب او ممكن انه يحدث شيء له ..

وكم العمر المفروض اني اخذه .. وهل الافضل لي اني من الاول اخذ ذكر وانثى او اخذ الذكر وبعدين الاثنى او العكس ..


واشكركم ع هذا الموقع وتسلمون والسموحه منكم ..

ارجوا انكم تفيدوني من خبرتكم في هذا العالم الجديد علي ..

سلاماتي ..

[فطوم]

أهلان فيك اخوي نورت لنا المنتدى
ومشكور وايد على كلامك الجميل
ومشكور مره اخرى لأنك قريت مواضيع قسم القوارض وكتسبت معلمومات ثم قررت شراء الحيوان ,اتمنى أن يقتدي فيك جميع الأعضاء قبل طرح الأسأله وشراء حيوان لايمتلكون معلومات عنه

بخصوص أختيار النوع الروسي فنعم الإختيار لأنه إجتماعي ونظيف وشكله ظريف وصغير وهو لعوب ودمه خفيف جدا


بخصوص مشكله مع القطط فيعتمد على طبيعه القطه انا كن عندي قطه دايما تنتظر الهامستر عند القفص(دايما يفتح القفص ويهرب) لين مره طلع وذبحته هي لن تأكله مجرد ستلعب به حتى يختنق ويموت, ولا أعاني من هذه المشكله مع قطي الحالي فهو يلعب فيهم كره بعض الأحيان:P ولكنهم يحبونه ويروحون عنده وهو لطيف معهم ويخاف منهم بصراحه:P

عليك التأكد من قفل باب القفص دايما حتى لاتحدث مشابكات تؤدي بحياه احد الطرفين

بخصوص العمر يجب ان يكون العمر من 2-3 أشهر.

ويجب أن تاخذ الزوجين مع بعض لأن الأنثى لاتتقبل ذكرا جديدا أبدا بعكس الذكر الذي من الممكن أن يتقبل انثى صغيره جديده.

اخي الهامستر يحب المكان البارد فأرجوك لاتدعمها في مكان حار وانت عارف جونا في دول الخليج الظب مايتحمله

وبما أن الروسي إجتماعي ولطيف لااعتقد انه ستحصل اي مشاجرات بين الزوجين ولكن ان لاحظت انهما كثيري الشجار وغير متفقان في اول الايام حاول تبديل احدهما عشان مايتظاربون الى الموت

[Withered Rose]

فطوم كفت و و فت

و نحن نرحب بكِ بانضمامك لنا كعضوة جديدة و اختيارك للهامستر كحيوان أليف ..
و حاضرين لأي إستفسارات

[عاشقة الهمستر]

هلا والله

في هاوينا الجديد

الصرراحة فطوووم قالت كل شيء

ويعطيهاا العافية

تحياتي

[passposse]

السلام عليكم ..

تسلمون خواتي وايد .. الله يخليج اختي فطوم ع الكلام الطيب منج ..

وتسلمون اختي Withered Rose وعاشقة الهمستر ع الحضورك الطيب والتواصل ..

اذا ممكن استفسار بسيط اخر .. نوع القط عندي سيامي فهل ممكن يصير شي ..

واحد منهم شوي مجرم لكن ممكن السيطره عليه والثاني مسالم والحمد لله ..

وعن القفص انا قررت اني اخذ البلاستيكي فهل هو افضل .. واذا اخذت الذكر بدايه وبعدين اخذت الانثى اول شي اتعلم بالاول والثاني بعد فتره اخذه ..

واضيف بعد هل من الافضل اني اخذ الزوجين بنفس العمر .. اختي انتي قلتي افضل عمر 2 - 3 اشهر ما بتكون هل اعمال صغيره وايد وممكن يموت الهامستر ..

شو رايكم .. اتمنى انه تبدون رايكم اي شخص يدش الموضوع يساعدني لو سمحتوا ..

واذا اي حد من الاعضاء يعرف مكان جيد اخذ منه الهمستر في أبوظبي .. وشكرا لكم ع تعاونكم ..

سلاماتي ..

[passposse]

السلام عليكم ..

في هذه الفتره قبل ان يرد علي احد بموضوعي قمت بالبحث في المنتدى ووجدت معلومات كثيره ولكن معلومه واحده اثارة اهتمامي كمبتدأه ..

عن حمام الرمل للهمستر هل يحتاج اني اشتري رمل معين له او ممكن اي رمل ممكن من الطبيعه استخدمه ..

وهل اضع هذا الحمام الرملي من اول ما احضر الهامستر او بعد فتره من احضارهم ..

افيدوني ارجوكم .. والله يعطيكم العافيه وتكون باذن الله في ميزان حسناتكم ..

تسلمون وايد .. سلاماتي ..

[Withered Rose]

أهلين passposse


القطط السيامية لحسن الحظ شديدة الذكاء ممكن تعلمينها انها ما تأذي الهامستر و لكن كل حيوان يرجع الى غريزته وقت الجوع أو ما شابه .. كوني حذرة
و في هذي الحاله إختيارك صائب في القفص البلاستيكي لأن القطط تحب تدخل ايدها بين قضبان الأقفاص الحديدية للعب في الهامستر .. كما انه يوفر الاستمتاع في المشاهدة الحيه للهامستر وقت اللعب

أما العمر اللي قالتلج عنه فطوم هو أنسب عمر .. عمرما تستطيعين أخذ الهامستر أصغر من ذلك و لكن لا ينصح لأنه سيكون شديد الحساسية و احتمال عند إصابته تجدين صعوبة في علاجه ..

أما الرمل اهم شي يكون جاف و نظيف و خالي من المواد الضاره .. و الهامستر يحبه كثيرا لأنه جزء من بيئته البرية
رمل البحر او البر النظيف أحسن شي و إن كان من المحل احسن .

اتمنى لج تربية موفقة للهامستر

[فطوم]

اختي بخصوص الرمل وذرد روز كفت و وفت لكن حبيت اقولج بس انه الرمل الخاص بالهامسترات مايباع في اغلب الدول العربيه وانا ماسمعت احد يتكلم عنه فديري بالج موتاخذين رمل القطط او الجنجلا او رمل مخصص للحيوانات الاخرى وتستخدمينه للهمستر لانه ممكن يضر عينه ويسببله حساسيه..

بخصوص متى تستخدمينه تقدرين تحطي صحن بالقفص في الرمل بس انا مانصح فيه انا كل مابغيت انظف الحوض وابدل نشاره الخشب احط الهامسترات في حوض بلاستيكي صغير في رمل ينظفون نفسهم وسبحان الله حتى ريحتهم تكون موحلوه بس من يسبحون بالرمل تروح الريحه

[passposse]

السلام عليكم ..

هلا والله فيكم خواتي Withered Rose وفطوم تسلمون ع الحضور الطيب ..

واشكر ردكم ع اسألتي الي ما تخلص ..

اختي Withered Rose تسلمين وايد ع الاضافه والرد منج .. من ناحية ذكاء السيامي هذا صحيح وايد ماشا الله لكن مطيع الحمد لله .. ومن ناحية الرمل متوفر عدنا رمل من الصحراء ينياب خصيصا للقطاو عندي فهو نظيف وزين وايد فهل ينفع لهم ..

تسلمين اختي فطوم ع التنبيه من ناحية نوعية الرمل انا ما بدور الا الافضل لهم باذن الله ..

الله يعطيكم العافيه ومشكورين وايد ..
سلاماتو ..

[ميركات]

اعتقد اختي بتلقين اللي تبينه في سوق الميناء في أبوظبي ...