هامسترتي حامل (( الاب هرب خوفا من المسؤليه ))

[المهمووم]

السلام عليكم
انا متورط
الهامستر مالتي كالتالي
1 - معرف نوعها
2- حامل
3- موعارف شلون اسبحها ولا شلون اتعامل معاهه
4- كله مغمضة عينها وحاطة الاكل في مكان واحد ومالها مزاج
ساعدوني!!
لخلي لكم صورتها على امل ان احد منكم يعرف نوعها
وعندي سؤال بايخ شوي
تعض؟

[طروقو]

معرف نوعها \ نوعها اذا كانت صغيره واذنينها صغيره روسيه اذا كبيره واذنينها كبار سوريه
حامل \ربي يهون عليها
مو عارف شلون اسبحها \ لاتسبحها ابدا
مغمضه عيونها ومالها مزاج \ كيفها حامل

[المهمووم]

انزين واذا ولدت شسوي
؟
خلاص يعني اخليها على راحتها؟

[طروقو]

اذا ولدت كثر لها الكالسيوم يعني جبن بيض بياض البيض حليب الخاص بالقطط عشان ما تاكل عيالها ولا تشيلها كثير

[×[( مروّض الـ قوآرض )]×]

أخوي المهوم ..

ياليت تنزل صوره لهآ .. و نحدد لك نوعها بالتحديد ..

و حآمل الله يخلي لك إياها ويخلي لك عيالها ..

ويكبرون في عزك ..

و إهتم فيها عطها أكل ولا تناظرها كثير ولا تلمسها كثير ..

خلها بحالها تماما ..

.. و تحيآتي لك ..

::..×[( مروّض الـ قوآرض )]×..::

[المهمووم]

مشكووورين شباب على مساعدتكم
اليوم سويت لها حفلة (( مو حفلة صج )) بس يعني تطورات
اولا
شريت لها قصر جديد (( قفص )) وعقمته وخليت فيه نشارة جديدة واكل جديد وماي وكل شي يعني كشخة
بس صار تصرف غريب عجيب
قامت تدور وتحفر في النشارة ومادري كانها تدور شي مضيعته!!
برايكم شنو الحالة هذي؟

[MR.Hyde]

اعتقد انها كانت دافنة اكل و بتدور عليه انا هامستري بيعمل كده برضو كل ما بغيره النشارة

[طروقو]

الحاله هذي انها فعلا مضيعه شي وهو هي تحفر زي الحفر فالنشاره فالبيت القديم وتحط اكلها وهي قاعده تحفر تدور الاكل الي خبته الافضل جب الاكل وطلعه وعطهياه وهي بتحطه فحفر

[المهمووم]

الحين خليت لها فاكهة, زبيب وخليت لها شوية شوفان مع كورن فلكس الي عجبها
شتنصحون اخلي لها بعد؟

[ذيــــ دبي ــــب]

اخوي بعّد عنها الكورن فليكس.. فيه سكر صح ..

الحلويات والسكاكر والشوكولاه وكل ما هو فيه سكر سواء حامل او لا يجيب للهامستر مرض السكري على طوول وبعدين يموت

وايضاا بعد البرتقال والليمون اتحمل تقربه صوبها سواء حامل او لا

خلني اعطيك شوي من خبرتي بالحمل

اولا .. اذا كان نوعهم سوري يعني بني او ابيض وبني .. افصل الذكر قبل لا يموت

لأن الام من كثر خوفها على عيالها تسير تذبح الذكر .. ولا تقرب صوبهم بس خلي الام تشتغل عليهم ..

اذا لمست العيال بتاكلهم لأن الهامسترات مثل القطط اذا لمست العيال تاكلهم لأنهم ما يحبون ريحه البشر على عيالهم

بس اذا كبروا عادي .. عط الام خس وجزر .. فواكهـ

بس اتحمل من الليمون والبرتقال والحلويات والسكاكر والشوكولا .. سواء حامل او لا هذا الاطعمه تموت الهامستر

خل العيال 20 يوم فما فوق مع امهم اذا شفت انهم خلاص مستعدين يتركون القفص بعد 20 يوم شلهم قبل لا تضربهم امهم لأنها تباهم يروحون ويعيشون بروحهم

ويبلغ الهامستر بعد شهرين ونص تقريبا يعني الشهر الثالث يكون بالغ خلاص

بس انا حبيت اعطيك هاي المعلومات العامه الحين برجع للحمل

اذا كان سوري افصلهم(ابيض مع بني او بني مع خطوط سوده او كامل ابيض او كامل بني)

واذا كان روسي بعد افصلهم (ابيض مع شوي خطوط سوده عليه)

اذا كانوا روسي كامبل قزم عادي خله(كبير بالعمر بس صغير يعني قزم نفس لون الروسي)

وحط للأم قطن او كلينكس وخلها بمكان دافي وبروحها وخط قفصها لحاف .. او قطعه من كل جانب إلا من جانب واحد للتهويه

واتحمل من الحشره .. الضجيج

بس عطها اكل واطمن عليها وبتكوون في امان ان شاء الله ..

بس بعد الولاده لا تعطيها حليب ابدا ..

ما اعرف السبب بس هذا الي قريته في واايد منتديات خاصه في هذا المنتدى

ومبروك لك البيبيز .. ويتربون في عزك ان شاء الله

نسييت اقولك .. ان لازم تحطهم في

مكان دافي وما فيه ضجيج وليس مضيء .. ولا تخلي حد يقرب منها او من اليهال.. ومثل ما قلت ماشي ضجيج او حشره هي لأنها بتخاف من الضجيج او الحركه السريعه وبتخاف وبتاكلهم

والسموحهـ