طبع يعجبني وطبع ما يعجبني ...... في الحمام !!!!!!

[abu hasan]

السلام عليكم ورحمة الله وبركاته

كيفكم أعزائي .. أتمنى تكونوا جميعا (أعضاء وزوار) بخير وصحة وعافية (إنتو وطيوركم طبعا)

الصراحة هذا الموضوع في بالي من كام يوم .. وكنت متردد شوي لإني ما أعرف إذا كان هذه الفكرة انطرحت قبل هيك أو لأ .. وكمان ما أدري إذا كانت رح تحوز على إعجابكم وتفاعلكم (هذا ما أتمناه)

كلنا بنعرف المقولة المشهورة "الطبع غلب التطبع" وأظن هذا الشئ مش عند البشر فقط لكن عند غالبية المخلوقات إذا ما كان جميعها .. والطباع في منها زين (مريح) وللأسف في منها شين (مزعج) .. ومن خلال تعاملنا اليومي مع الحيوانات الأليفة أكيد بنلاحظ فيها طباع تعجبنا وتدخل البهجة إلى أنفسنا .. وطباع ثانية تزعجنا ويمكن حتى تنرفزنا .. وهذا يا أعزائي ينطبق كمان على طيور الحمام .. والمطلوب إنه كل شخص تعجبه الفكرة يخبرنا عن طبع يعجبه وطبع ما يعجبه في طيور الحمام (يعني من جهة رح نمدح الحمام ومن جهة ثانية نقوم نحش فيه ) .. وأنا رح أبدأ يعني من باب التشجيع وآسف إذا كنت طوّلت عليكم في المقدمة

أنا رح أفصل بين الذكور والإناث .. وأتكلم عن طباع زينة وشينة لكل منها.

ما بعجبني في الذكور (في التربية الجماعية) إنه لما ييجي ذكر يلقح أنثاه تلاقي الذكور تغيص عليه من عدة جهات (خصوصا ذكور معينة) وتخرب على الجوز فرحتهم

لكن بالمقابل بعجبني إنه نفس الذكور لما تشوف حد من القطيع يطعم فراخه على الأرض .. ما تتدخل فيه ولا تزعجه .. سبحان الله وكإنها مدركة لرسالتها في الحياة وحريصة على إستمرار وبقاء جنسها

أما الإناث .. فبشكل عام ما بعجبني (حتى بزعجني) إصرار الأنثى على زيح القش على الجوانب (مع إني مرات بزيد القش أو بصلح العش) وبالتالي لما تبيض بكون بيضها ومن ثم الفراخ على أرضية التنكة أو الفخارة بدون قش وبشكل خاص ما بعجبني الأنثى اللي بتكون خوافة زيادة عن اللزوم لما أقترب منها وبتصير تخابط لدرجة إنها ممكن تكسر البيض أو تؤذي الفراخ

وبعجبني جداً في الإناث حنيتها وحرصها الشديد على حضن البيض .. لدرجة إنها تقريبا ما بتوكل (يا دوب حبتين عالسريع وبترجع تركض ركاض على عشها)

سبحان من وضع الطباع في مخلوقاته .. ومرة ثانية آسف عالإطالة وأتمنى الفكرة تعجبكم وتتفاعلوا معها

مع خالص تحياتي للجميع