حكاية ( ابـ اروى ـو ) مع السمان

[ابـ اروى ـو]

بسم الله الرحمن الرحيم

السلام عليكم ورحمة الله وبركاته

اسعد الله أوقاتكم بكل خير يسرني ويسعدني أن أحكي لكم هذه الحكاية والتي أتمنى أن تنال رضاكم وان تستفيدوا منها بإذن الله والى الحكاية

كان ياما كان قبل شهرين من الآن وفي يوم من الأيام حصلت حكاية على محدثكم ابـ اروى ـو وأنا أتجول في احد محلات بيع الطيور حيث كنت ذاهب لشراء مجموعة من بيض الدجاج لفقاستي وقع نظري على طبقين بيض سمان سألت كم السعر قالي الطبق 12 ريال طيب كم جوز السمان قال بـ 12 ريال حسبتها براسي يقال لك مسوي فيها عبقري بسوي دراسة جدوى

(قلت طبقين من 12ريال يعني 60 بيضه بـ 24 ريال خل يفقس منها 45 صوص تصفي في النهاية بعد 62 يوم من وضعها في الفقاسه ( 17 يوم بالفقاسه + 45 يوم إلى سن النضج ) 40 سمان قل فيها 20 أنثى يعني كل يوم 20 بيضه في الشهر 600 بيضه يعني بعد 92 يوم ( يكون فقس 221 باعتبار أن نسبة التفقيس 85% ويكون باقي عندنا 340 بيضه بالفقاسه ) وهكذا عملية طرديه عاد شف كم راح يكون عندنا بعد 6 أشهر

شكلي لحست روسكم أو مدري راسي اللي منلحس المهم قارنتها مع لو أني اشتريت بـ 24 ريال 4 سمان ( 3 إناث و 1 ذكر ) يعني كل يوم 3 بيضات يعني بالشهر 90 بيضه بعد 30 يوم ( بيفقس منها 33 صوص بنسبة 85% ويبقى عندنا في الفقاسه 51 بيضه ) وهكذا عمليه طرديه احسب بعد 6 أشهر كم عندك المهم استقر الرأي على إني اخذ 60 بيضه بـ 24 ريال
الحين بدينا رحلة المعاناة مع البيض
أول ما وصلت المزرعة نزلت البيض وحطيت ماء بسطل وقمت بغمر البيض فيه عشان أفرزهن أشوف الصاحي فيهن وفي النهاية يتم استبعاد 15 بيضه ، صفى عندنا 45 بيضه هذا قبل أحطهن بالفقاسه فتحت الفقاسه وطلعت الصينية حقت البيض يوم حطيت فيها مجموعه من البيض وإهين يطيحن من فتحتها لأنها وسيعه ماهي مخصصه للسمان بس للدجاج والبط المهم يوم طاحن وينكسر منهم 5 بيضات صفا عندنا 40 بيضه عدلت على الصينية شوي وحطيت البيض والحمد لله خليتهن 17 يوم وفقس منهم 24 بيضه يعني صفا عندنا من 60 بيضه 24 صوص عند الفقس حطيتهم بكرتون ولعت عليهم لمبة لأنه كان الجو بارد حطيت لهم الأكل والماء بالسقاية المخصصة لصوص الدجاج وهنا واجهتني مشكله صاروا يغرقون بالماء وكل يوم واحد ميت وتصفي بالنهاية على 14 سمان عند النضج قلت الحمد لله العوض ولا ألقطيعه بعد 45 يوم بدوا يبيضوا أول يوم لقيت 2 بيضه ويوم مالقيت شي واليوم الثالث لقيت 3 بيضات وهكذا لين وقفوا على 5 بيضات في اليوم يعني صار عندي 5 إناث و9 ذكور يعني بعد شهرين رجعت لنقطة الصفر لو أني في البداية أخذت بـ ال24 ريال 3 إناث وذكر وخليت البيض كان أحسن لكن على العموم ما حصل إلا الخير
قلت الحين لا بد إني استغل هالبيض وأعوض وقتي وخسارتي فصرت كل 6 أيام أحط طبق بيض سمان بالفقاسه والحمد لله بدء التباشير فقس مجموعه اليوم وعالجت مشكلة غرقهم باني سويت لهم مشرب خاص تشوفونه بالصورة إن شاء الله المهم اكتسبت خبره وحليت كثير من المشاكل اللي واجهتني تعرفت على السمان وكيفية تربيته وماهو غذاءه والحمد لله على كل حال والحين اتركم مع الصور
أتمنى تنال إعجابكم واعذروني على سوء التصوير وأسلوب كتابة المقال
شكرا لكم جميعا
وإلى الصور
اولا السمان اللي صفو من الطبقين بداية الحكايه

البيض اللي حصلت عليهن من السمان

حطيت البيض في الصينيه بعد ادخال بعض التعديلات عليها حيث وضعت داخل مجاري الصينيه شبك ذو فتحات ضيقه ليمنع صقوط بيض السمان

فقسو البيض بعد 17 يوم

الصوص داخل الحضانه

الصوص داخل الحضيره الأوليه

سقياية صوص الدجاج اللي غرق فيها صوص السمان

سقياية مبتكره للسمان