الكاسكو عندي اصبح هاديء ولا يأكل

[Mutaz868]

السلام عليكم ورحمة الله وبركاته ..
هذه اول مشاركة لي في هذا الصرح الشامخ

اخواني ندخل في الموضوع على طول
اشتريت فرخ كاسكو هولندي قبل اسبوع وكان ماشاء الله عليه يتحرك ويلعب و ياكل لكن فيه خوف شوي
وامس اخذته ل شخص خبره في الكاسكو وقص اظافره وبرد منقاره ورجعته لقفص غير القفص الاول ( الثاني كبيييير )
لكن من بعدها تغير الطير اصبح لا يعرف ياكل الحب الشمسي + هدووووء
وفي نفس الوقت يأكل الخيار + التفاح بشكل طبيعي .. وديته للبيطري قالي معاه زكام اعطاني علاج 10 قطرات + مضاد في 100 ملم ماء

سؤالين واسف ع الاطاله

هل هذا الهدوء وعدم مقدرة الببغاء على اكل الحب طبيعي ؟

هل الزكام يعتبر مرض مميت لفرخ الكاسكو في عمر 6 اشهر ؟

وشكراً جزيلاً مقدماً

[hassan-55]

سبحان الله انا مثلك يوم شريت الطير مثل اللي عندك
بعدها بإسبوع قلت ادلع الطير واخذ له قفص كبير بعدها بيوم صار خامل وما ياكل
ومرض انا اتوقع ان سبب مرضه كنت معلق القفص خلف باب الحوش يمكن جاه هواء
هذا الكلام قبل شهر وكان الجو مو بارد مره اتوقع السبب من الهواء وتغيير القفص
ــــــــــــــــــ

اتنبه للطير واذا ما اكل حاول تاخذ له مضاد حيوي
وياليت ترفق صور لبراز الطير اكرمكم الله

انا عن نفسي جربت ثلاث فروخ واحد مات فجأة كش الطير وما ياكل ووقتها ما كنت فاضي له
او اني اهملته
الاخير والله تعبت معه كثير اكثر من ثلاثة اسابيع والحمد لله تحسن وبعته علطول
توبه من الفروخ بالذات الهولندي

اتنبه ياخوي قلت الاكل والخمول ونفش الريش معناه الطير مريض ويبان المرض من الاسهال اكرمك الله
صور وارفق صور الان وان شاء الله ما بيقصرون معك الاخوان

وان شاء الله بأتابع الموضوع الله يشفي طيرك

[hassan-55]

وحالياً لا تعطيه فواكه وخضار لين يتحسن

واذا ما اكل حاول تغره
وحتى العلاج ممكن ما يشربه
بعد ما تضيف العلاج في الماء بمشرب الطير اسحب قليل مقدار 1 او 2 مل بالابره
واعطيه مباشره بفمه والباقي يشربه براحته

[AVOCADO]

عليكم السلام

غلطتك انك قصيت اظافره وبردت منقاره لسبيين
اولا لانه فرخ
ثانيا لسه جديد عندك

---

كان المفترض بما انه فرخ وجديد تخليه عندك اقل شي شهرين ثلاثه وتدربه كويس وتخليه يحبك ويتعلق فيك

ثانيا اذا نويت تقص اظافره وما عندك خبره , توديه لواحد خبير واالاهم انت ما تكون متواجد اثناء قص الاظافر عشان لا يأخذ الطير منك موقف سلبي

---

وما اعتقد عنده زكام والله اعلم
بس اعتقد البيطري الي رحتله يبغى يبيع باي طريقه
فاخبرك ان عنده زكام عشان يقنعك تشتري الدواء

----

والي صارله ان الفرخ نفسيته تاثرت من قص الاظافر وتأثرت اكثر من برد المنقار

لانه الكاسكو طائر ذكي وحساس فلما قصيتله اظافره وبردت منقاره هو فهمها انكم تعديتم عليه او على خصوصياته


الحل
حاول تجلس مع الطير اكثر وقت والعب معه وتمسح على راسه
ولا تحبسه كثير في القفص

ولا تجرب معاه شي جديد حاليا كالترويش او تغيير القفص او أي شي يخطر على بالك
لانه راح يفهمها تعذيب او تعنيف او أي شي ما يعجبه , مثل القفص الكبير او الترويش او غيره
الا بعد ان يتجاوز هالمرحله النفسيه ممكن تجرب شي جديد

مرحلته النفسيه خطيره اذا ما قدر يتجاوزها او انت تتعامل معاها كويس راح تطور حالته لشي اخطر

حاول تأكله من يدك , واذا ما اكل .. اعطيه الاكل الي يحبه من يدك انت

لان الطير شكله زعلان منك على الاخر
بالعربي دلعه , غازله
وانتبه تقسو عليه

ما يشوف شر
ولا تنسه تطمنه عليه

[Mutaz868]

حبايب قلبي شكراً لردكم
الطير الحمدلله ياكل من يدي والبراز اكرمكم الله جامد وليس سائل
المشكله كلها عدم مقدرته على قضم الحب الشمسي هو يحاول لكن يرميها مايقدر عليها
وهدوء الطير اقلقني شوي
حالياً انا بالدوام وكلمت اخوي يقولي الحمدلله رجع يصفر ويتحرك وياكل من الحب لكن مو كثر اول
يعطيكم الف الف عافيه ولنا عوده ان شاء العزيز

[hassan-55]

الحمد لله دام برازه اكرمكم الله سليم
لكن راقبه اذا ما أكل او ما قدر ياكل الحبوب
اعطيه بطاطس مسلوق و حاول تطحنها او تهرسها واعطيه رز ابيض مطبوخ بدون اضافات وحاول تطحنه او اشتر له سريلاك خاص تلقاه بالسوق صيدليات الطيور
حطه بالصحن وراقبه
اذا ما اكل اعطيه بيدك او بالابره "غره"

انا مستغرب ليه تبرد منقاره ؟ اش الفائده
انا عن نفسي مستحيل ابرد منقار طير ابد حتى لو يعض لو يقطع يدي
تخيل لو ادمي برد او زين اسنانه تتوقع ياكل
يارجال انا ركبت كذا ضرس تركيب قعدت كم يوم ما استمتع بالاكل
فما بالك بطير

اما بخصوص قص الاظافر بالنسبه لي كل ما حسيت بطول او اذى الظفر قصيته بنفسي تقص الطرف فقط ولا تتعمق لا تاذي الطير ويخرج دم
واحاول ما اذيه بهدوء اقصه

[Mutaz868]

والله ياخوك الطير اليف ولايعض بس وش تقول على الشور الغلط تسمع ذا يقولك ابرد منقاره والثاني يقولك قص اظافره
لكن ان شاء الله انها الاولى والاخيره ان اراد المولى
ابعطيه بطاطس مهروس واسحب من عنده الحب والا اخلي الحب ؟
تعبتكم معاي لكم جزيل الشكر

[hassan-55]

الله يعينك اخوي ان شاء الله فتره قليله وتعدي بإذن الله تعالى

طلعه برا القفص واعطيه البطاطس او الارز بيدك واذا ما قبل مالك الا بالابره اعطيه قليل لا تكثر عليه
مقدار 2 او 3 سم

وخل دائماً الصحن فيه كميه من الحب او المشكل في مشكل ممتاز بلجيكي يحتوي عل حبوب مشكله
وفواكه مجففه

واذا ما اكله مثل ما علمتك طلع الطير واعطيه مباشره باليد واذا ما اكل بالابره

وان شاء الله خير بس راقبه
انا صار لي نفس طيرك ما يكل بس كان مريض
والله مداوم عنده صباح وعصر وليل
اعبي له الصحن حبوب واعطيه بيدي البطاطس و الارز بعد طحنهم واحط بالابره
كل ثلاث او اربع ساعات اعطيه 2 سم

اسف على الاطاله ,, اسأل الله لنا ولكم التوفيق..