منتديات تو زوو متخصصون في عالم الحيوان وتربية
المخلوقات الجميلة ويضم منتدانا أكبر وأروع تجمع لهواة تربية الحيوانات والطيور
والأسماك والأحياء المائية والزواحف والبرمائيات ولمتابعي تحركات الحشرات
والمفصليات ولمحبي الزراعة والعناية بالنباتات كما نوفر لكم من خلال سوق تو زوو
الالكتروني الكبير عرض سلعكم بالمجان وبعد ذلك كله تستريحون في استراحة الهواة
متمنين لكم طيب الاقامة لدينا
السلام عليكم
حاب اوريكم الطريقة اللي اربي فيها عدد 40 فرخ دجاج في البيت اغلبهم اعمارهم قريب الشهرين انا اشوفها طريقة نظيفة مافيها ذبان ولا حشرات ولا ريحة كريهه ولا تعب في التنظيف فحبيت اوريكم شغلي وابي تعليقكم على الطريقة اللي اتبعها هم عشان نستفيد من خبراتكم ونطور نفسنا في تربية الطيور .
القفص من الخارج تقريبا مساحته مترين في متر حطيت تحتها خشب عشان يرتفع القفص عن الارض وحطيت تحته نايلون وفوقه حطيت كمية لابأس بها من التراب وفعلا الطريقة مريحة وهم الدجاج دايما ينظف نفسه بين فترة وفترة بالتراب وهم ياكل منه الظاهر انهم يحتاجون لاكل التراب بين فترة وفترة
الطيور داخل القفص وكلهم متراكمين عند الباب لاني معودهم كل يوم الصبح اني اهدهم بالحوش عشان يمددون رجولهم وياخذون لهم حمام شمس
طالعوا القفص الصغير هذا انا اعزل فيه طيوري المريضة لان ان مرضت دجاجة تعدي غيرها فلازم نعزلهم
هني الدجاج وهم منتشرين في الحوش ويراكضون ويستانسون ويشمون هوا انا اعتقد ان صحة الطير الحقيقية هي في انك ماتحكره وانا مدلع دجاجي حيل من هالناحية كل يوم اطلعهم واخليهم ياخذون لهم فسحة بالكورنيش
هذا ريوقهم انا مسويه بنفسي وهو خبز يابس منقع بشوربة لحم او دياي زايدة ترى مومسويها مخصوص حقهم وبصلتين كبار قصصتهم لهم بنفسي وثومة كاملة طبعا يومها صارت مباراة كرة قدم امريكية في الحوش عشان هالشوية بصل ماهقيت انهم يعرفون فوائد البصل لهلدرجة
الحين اخليكم مع الفيديو وترى الفيديو صورته بيوم ثاني وهذا للعلم فقط وتقدرون في الفيديو تركزون اكثر على طريقة القفص والتراب اللي فارشه بالارض وأأكد لكم ان مافي لاريحة ولا حشرات والتنظيف سهل حيل ماياخذ منكم وقت وترى كل هذا ماكلفني حتى 50 دينار كويتي من علف وقفص ومعالف ومشارب والقفص والفروخ
اللهـ يجزاكـ ألف خير على اهتمامكـ بهم ورعايتهم ومراقبتهم الدائمهـ ,, وحرصكـ على صحتهم .
واللهـ شغل نظيف ومرتب ,, مع انهـ عندي ملاحظات بسيطهـ اذا تسمح لي أذكرها :
هالباب اللي يفصل بين المنطقهـ والكراج هل هو مسكر وفيهـ باب ولا لأ ؟؟
لأن كأنهـ مفتوح وهذا خطر كبير على الصيصان ,, اما ان أحد يشغل السيارهـ ويدعس احد الصيصان لاسمح اللهـ (( صار لي هالموقف ))
أو يفلتون منكـ اذا شافو باب الكراج مفتوح ويطلعون للشارع .. عشان كذا لازم يكون مسكر عليهم .
بالنسبهـ لعددهم حاليا مع حجم القفص ممتاز ,, لكن اصبر عليهم شوي وراح يكبرون ويكبر حجمهم .. القفص بيكون ضيق جدا عليهم ومافيهـ مكان مريح يبيضون فيهـ , وأيضا بيهربون بسهولهـ من السور المحيط بمكانهم .
الا اذا عندكـ قفص آخر أو مزرعهـ أكبر من اللي في الصورة ,, ممكن تضيفهم فيهـ اذا كبروا ان شاء اللهـ .
هنا في الصورة فيهـ مكان معزول للدجاج المريض ,, لكن لازم يكون موقعهـ بعيد عن الدجاج السليم ..
لازم تغير مكانهـ بعيد من موقعهـ الحالي .
في هالصورة لاحظت انكـ توكلهم على جرائد ,, وأحيانا هالجرائد يكون مكتوب عليها اسم اللهـ أو أذكار ,, ومانبغى يكون مصيرها تحت الدجاج .. فاذا تبغى تغطي المنطقهـ فيهـ يبيعون بالمكتبات ورق مقوى للكتابهـ عليها حجمها كبير وممتازهـ . اسمها لوحات اذا ماخانتني الذاكرهـ .
أو ممكن تستخدم سماط الأكل ,, لكن لازم تثبتهـ بالأرض بحصيات على أطرافها أو بثقل أو لزاق .
وايضا أنت توكلهم في صندوق كرتوني ,, مشكلة الكرتون مع الرطوبهـ راح يتقطع وياكلهـ الصيصان ,, وبيجيهم تلبكـ معوي لاقدر اللهـ ويموتون لأن أمعائهم ماتقدر تتخلص منهـ ..
ممكن تبدلهـ بجيكـ بلاستيكـ أو معدني كبير .. أسهل جدا في التنظيف ويعمر معكـ .
أعتذر لكـ على الإطالهـ ,, لكن حبيت أنبهكـ بهالنقاط لسلامتكـ وسلامة صيصانكـ ..
ألف شكر لكـ مرة أخرى على مشاركتكـ بالصور معنا ,, واللهـ يوفقكـ في تربيتهم .
شكر خاص لاخواني اعضاء احلى منتدى على مروركم
اخت صمت الامل
بالنسبة للصورة الاولى ترى مومفتوح على القراج في شبك بس مومبين معاج يمكن والخشب حاطه عشان تكون هذي حدودهم وسبحان الله كأنهم فاهمين انها حدودهم يصعدون فوق الخشبة ويقعدون عليها لكن مايطمرون للجهة الاخرى يحبون يظلون مع بعض هذا الحلو فيهم
بالنسبة للملاحظات الاخرى معاج حق وراح ابعد الدجاج عنهم مع اني اشوف ان مسافة كافيه لان الدجاج اكلهم منفصل ومشاربهم منفصلة وبالنسبة للجرايد ادري خطأ ولكنها اقتصادية وبعدين جذي ولا جذي بالاخير مصيرها بتنقط بالزبالة
وترى هالعشة مجرد بداية ومع الوقت راح تتطور اكثر ان شاء الله