قتلوا بستي! كيف آخذ حقي منهم؟

[Abby]

السلام عليكم ورحمة الله

ياجماعة عيادة مشهورة جدا في جدة قتلوا بستي!

راح اكتب الي صار بالتفصيل..

بستي انثى عمرها 11 شهر..

قبل يجي 3 اسابيع..بدأت البسة تستفرغ وبطلت تاكل..
وديتها واحة الحيوان..بعد مافحصها الدكتور حسان اعطاها مغذي وانتيبيوتك عشان حرارتها مرتفعة ودوا يعمل ريكلاس للمعدة وقالي في شي في بطنها..بكرا وديها عيادة عندهم أشعة واعمليلها اشعة ضروري..

وفعلا بعد مابحثت في قوقل لقيت العيادة (الي ابغى اشتكيها) اكتر عيادة مرشحة..وفي كذا منتدى وموقع..حتى في تو زو مرشحينها..غير كدا وحدة من صحباتي رشحتها لي..

المهم اخدتها العيادة..واول شي لاحظته هناك انه الدكتور ماعقم طاولة الكشف رغم انها كانت مليانة ريش!...مجرد مسحها!!
تاني شي مالمس حتى بطنها عشان يتأكد قالي هيربولز واعطاها الدوا حقه ومغذي..قلت له يادكتور ابغى اعملها اشعة.. الدكتور الي رحت له امس قالي كذا كذا,وانا اساسا جاية عشان الاشعة..قالي لا مايحتاج our treatment is different!! قلت يللا هو ادرى بشغله..

رجعنا البيت وبدأ ينتفخ جنبها لمن صار مرة كبير..طبعا من المغذي شكله ما ضربلها الابرة مزبوط..
على يوم تاني بدأت تاكل وتلعب وتنطنط..يعني تحسنت..

لكن بعد اسبوع بالزبط من دا الكلام جيت من الجامعة لقيت الله يكرمكم خيط صوف طالع من فتحة الشرج!!
وعلى طول اخدتها لنفس العيادة..فحصها دكتور تاني غير الاول وقال تبات عندنا نجرب بمواد كميائية معينة وزيوت يمكن يخرج وكمان لازم نعملها اشعة..
سبتها عندهم وكلمت الدكتور يوم الخميس الصبح قالي انا دحين حعملها العملية..رجعت كلمته العصر قالي خلاص عملت العملية والبسة كويسة وتعالي خديها السبت بعد الساعة 5..
الين دحين تمام.. يوم السبت الصباح كلمت العيادة ابغى اطمن عليها..الدكتور الي رد بعد ما اعطيته اسمها وكدا قالي ماعندنا بسة بدا الاسم!!
رحت دقيت على الطوارئ لأنه الدكتور الي اتعامل معاه هو المسؤول عن الطوارئ..رد وقالي : احنا عملنا العملية "اليوم" بس ماطلعنا كل الخيط لأنه في مكان صعب نطلعه ممكن يآذيها لكن حنديكي علاج تستمر عليه وحيطلع بقية الخيط! واحسن تاخدوها الاحد!

رحت الأحد آخدها..والله ياجماعة كل ماقابلت دكتور يقولي انا الي سويت العملية(لأني طلبت اقابل الكتور الي عمل العملية)..الي اتواصل معاه على رقم الطوارئ مفهمني انه هو الي عملها..الي عالجها اول مرة وهو نفسه الي ع الريسبشن يقولي انا!! طبعا هم مايدرو اني سألت اكتر من دكتور!!
غير كدا جابو لي بسة تانية مو حقتي!! يقولو لي هادي حقتك!! والله ياجماعة انه البسة الي جاب لياها من نوع نادر (طبعا حقت ناس زيي جايبينها تتعالج)يعني لو اني ما اخاف ربي كان اخدتها ومشيت!! انا هنا بديت ابكي ورحت دخلت الغرفة الي جوه الي مخصصة للعاملين فقط..رحت ادور عليها..لقيتها جنب البسة الي بالغلط جابوها لي..لقيتها مريضة وصوتها يحزن..
انا شوفتها وشوفت المكان الي يعملو في العمليات..ياربي والله انفجعت!..البسس المريضة تقريبا بنفس المكان الي فيه طاولة العمليات..وكمان شوفت بنفسي بسة بطنها مدري جنبها مفتوح قاعد يعملها الدكتور عملية!! والعمال البنقاليين رايحين جايين في المكان! ما اعرف هو عادي دا الشي؟؟!
اقسم بالله انه في بسة قفصها الصدري طالع من شدة المرض..مدري كيف حاطينهم في نفس مكان العمليات! مو المفروض غرف العمليات تكون مغلقة ومعقمة ونظيفة؟!
المهم البنقالي لمن قلت للدكتور دي بستي تخيلو فتح القفص وجا يبغى يشيلها من بطنها!! مكان العملية كان في بطنها..يعني لو ماكنت موجودة اش كان صار للجرح حق العملية!!!؟؟
المهم قلت للدكتور بنفسه يشيلها ويحطها على الطاولة عشان ابغاه يشرح لي بالتفصيل كل شي((وللمعلومية هادا تالت دكتور يقولي انا عملت العملية!))..
المهم بدأ يشرح لي انه كيف الامعاء كانت اولريدي التئمت على الخيط..وكيف انه لمن شق بطنها ودور مالقي الخيط..شق مكان تاني وبرضو مالقي!! بعدين الاخ اكتشف موضوع انه الامعاء التئمت عليه!! وقالي السبب انه اتأخرت انا عليها كان لازم اجيبها بدري لأنه الخيط له اسبوع في بطنها!!(عصبت عليه وقلت اني جيت للدكتور الفلاني وقالي هيربولز ومارضي يسوي لها اشعة)
طبعا صرف الموضوع وقالي كمان انهم طلعوا الخيط كله!!(عكس كلام الدكتور حق الطوارئ) ولمن جلست اسأله وطفش راح جاب لي العلبة الي فيها الخيط وفيها جزء كبير من امعاءها!! يعني استأصلو جزء من الامعاء!
والله انه الشق في بطنها مرة كبير..حسبي الله عليهم! وحتى الدم لسا ع الجرح مانظفوه ومسوّد!
ولمن جلست استفسر زيادة جاني الدكتور الي كان قاعد يعمل العملية..في نص عمليته وبيده القلفزات والادوات يجي يكلمني ويرجع(كذا مرة)! وفي النهاية اكتشفت انه هو الي عمل العملية!!!
والله ياجماعة اني شكيت انهم سوولها العملية في صباح اليوم الي جيت اخذتها فيه!
المهم..وصف لها دوا مضاد للبكتيريا اسمه انازول(دوا بشري..قالي متوفر في الصيدليات العادية)
وقالي لا تأكليها شي لما بكرا زي دا الوقت..(هادا الي خلاني اشك انهم سووها في نفس اليوم)
ووصاني اعطيها ملّي ونص من الدوا مرتين في اليوم+ما اعطيها الا أكل يكون سايل لمدة شهر.
اخدت بستي البيت وعملت بتعليمات الدكتور حرفيا!
لكن تالت يوم بعد العملية بدأت تستفرغ الله يكرمكم استفراغ لونه بني غااامق يميل لللأسود!
كلمت الدكتور قالي اعطيها قد ملعقة الطعام من اكلها(دجاج سايل) كل ساعتين ولمن سألته طب تحتاج مغذي؟؟..قالي ايوه اعطيها مغذي اسمه Ringer Lactate تلاقيه في اي صيديلة عادية..برضو كل ساعتين..وفعلا والله كنت حتى بالليل اوقت المنبه كل ساعتين اقوم اشربها المغذي والدجاج بالسيرنج..

رابع يوم بعد العملية الي هو قبل أمس الاربعاء..الساعة 2 بالليل استفرغت بستي مرة تانية استفراغ اسود على بني غامق وعلى طول بدأت ترتجف..وعيونها مفتوحة
بعدين هدأت ووقف تنفسها..على طول قالت لي ماما انها ماتت!!!
انا ماصدقت وجلست جنبها ابكي...جسمها كان دافي وعيونها تطل فيني..
ما استوعبت انها ماتت غير لما بدأ جسمها يتصلب..

عمري ماتخيلت اشوف بستي بدا الشكل..لا حركة ولسانها برا وعيونها مفتوحة..
انا بستي كنت من كتر ما احبها واخاف عليها ما أأكلها حتى من اكل البيت..اشتري لها دجاج ولحم واسلقهم بنفسي..حتى اكل السوبرماركت ما اعطيها..مويتها كنت اغيرها اكتر من 4 مرات في اليوم..حمامها الله يكرمكم انظفه اول ماتستخدمه..يعني عمرها مااستخدمت حمامها وفي فضلات..انا لو بيدي كنت اعطيها روحي! والله العضيم لو اقدر اعطيها من عمري اعطيتها..
انا احبها اكتر حتى من نفسي..

المهم...استنينا الصبح يطلع ودفنتها جنب البيت..

حسبي الله عليهم ونعم الوكيل..انا ما اقدر اخليهم يفلتوا بجريمتهم..ولا ابغاهم يقتلوا حيوانات زيادة..
ابغى آخذ حق بستي منهم..
اش احتاج اسوي؟ وفين اروح؟؟

[خبيرهـ الحيوانات]

حسبي الله ونعم الوكيل ..
اوك انت روح العيادهـ وقول لهم ان قطتي ماتت .. واشتكي عليهم ..
لاكن الدكتور اللي تعامل مع قطتك يمكن يطلع مش مضبوط ..
او يمكن انت تأخرت في علاجهـا
الله يعوضكـ ويصبرك خيـوو
..
..
..

[JASSICA]

حسبي الله ونعم الوكيل عليهم والله لو انتي من جد انسانه لا تسكتي عن حقك والله ما يفلتون الله يلعنهم المجرمين هدولي ناس وجع في قلوبهم سفااااااااااااحين الله يكون في عونك ويعوضك ببسه تملالك البيت سعاده الله عالم على الي بيسوه

[وزة]

والله لو تشوفيني دموعي كيف ،، من جد حاستبك واتخيلت نفسي مكانك

ومن جد لاتسكتيييييييييلهم

والمفروض مدام شكيتي فيهم كان مااستمريتي عليهم

بس يلا ربي يعوضك الي احسن منها يااارب

[حبيب إلياء]

الله يدمرهم شر التدمير
روحي اشتكي عند حقوق الحيوان
الله ياخذهم كل دكتور نصاب ان شاء الله يورينا فيهم عجائب قدرته
امين
امين امين
امين امين امين

[هآمسترهـ ,]

لآ لآ

شوفي هيّ ححرڪه تخسرينهم
شر خٍسآره

قصتك ذي حطيهآ بكلِ مكآنْ ف آلنت

وآڪتبيٍ آسم آلعيآدهِ وخبريهمٍ كيف آشكآل آلقطآوهٍ

رآح توصلهمِ آلفڪره ومآرٍح آحد يجيهمٍ

حسبيِ آللهّ منِ يسونِ كذآ بقطهِ كيف مآيرتآحِ ضميرهمِ

آللهم بددهِم بمآ فعلو آللهٍم همِ لآيرفقونِ بآلحيوآنِ فجعلِ آيتڪ فيهم

جد قهر , وآلله بڪيتْ لآ تخآفين إذآ ضآع حقڪ ف آلدنيآ
مآرآح يضيع فآلآخرهٍ

[صاحب مدرب نمور]

هنا فى السعوديه ماحتقدر تاخذ حقك فى الدنيا

لأن القضاه محرمين اقتناء القطط!!

[تروكي]

لو انا بمكانك جلدت الدكتور هههههههههههه وشتكيته

[فقع]

لاحول ولاقوة الا بالله
ما ابغى اظلم حد لربما فعلا كانت مريضة جدا وزاد المرض بعد العمليه وهذا المرض هو ( السرطان ) اللهم عافينا
على كلا الله يعوضك خير واكيد صعب اللي صار وخاصة فراقها بس على الأقل انتي ماقصرتي معاها وما حرمتيها وساعدتيها وربنا راح يكتبلك هذا في ميزان حسناتك وانا متاكد ماراح تنساكي
الله يكون فعونك فعلا

[M!ss sese]

حسبي الله عليهم ..

و بالنسبه اقتناء القطط مو حرام /,,

ليه القضاء يحرمونها !!

و اختي ق1

انا اقولك خذي حقك بنفسك مو لازم تروحي تشتكين

روحي نفس العياده و تفاهمي وياهم ..

و ربي يعينك