خطوات سهله وبسيطة لنجاح ترويض البادجى

[bonsho]

فى البداية انا اود ان انقل لكم خبرتى القليله جدا جدا والمتوااااااضعة لعل وعسى ان يستفيد منها اى شخص

الترويض هو جعل الطائر لا يخاف من البشر ويعتاد عليهم وهو يختلف عن التدريب فالتدريب لا يمكن ان يبدأ الا بعد انتهاء الترويض

بعض الصفات التى سوف يحتاجها المروض
1: الصبر
2:حب هذا الطائر والرغبة الصادقة فى ترويضة
3:الثقة فى هذا الطائر وذكائة
والصفة الثالثه يمكن فى ناس تستهزأ بيها بس بجد بتفرق جدا وانا لما جيت اروض اول بادجى لى كنت بكرهه طائر البادجى جداوكنت بقعد اقول عليه انه غبى واستحاله يفهم حاجة وعلشان كدا الموضوع خد منى وقت طويل اوى بس لما بدأت اثق فيه واحبه لاقيت بجد اد ايه هو ذكى وبيعرف صاحبة

نبدأ بالخطوات
1: ماتنساش ان ممكن يكون الطائر دا اتعرض لمواقف قبل كدا مع البشر خلته يفقد الثقة بيهم ويحس ان البشر مثل الوحوش بالنسبة له فلازم تدى له وقت على اعادة الثقة مرة اخرى

2: ان الطائر يتعود عليك ودا هايجى بأنك تستمر كل يوم على تغير الماء والطعام وشويه شويه الطائر هايتعود عليك وهايعرف ان انت اللى بتجيب له الاكل وتحط له الماء

3: بعد ما الطائر اتعود على شكل وجهك لسا فى فراغ بنكوا ولازم تبدأ تقلل منه ابدأ اتكلم قدام القفص بصوت هادى وحط ايدك قدام القفص (ودى مش سخافة لان الطائر الصوت بيأثر فيه وبيعرف يميز صوتك لما يتعود عليه) لحد ما يتعود على شكل ايدك

4: اعرف ايه الاكل اللى الطائر بتاعك بيحبه بانك تجرب تحط له كذ نوع اكل وشوف ايه اكتر حاجة عجبته لدرجه انه ممكن يعمل المستحيل علشان يوصلها (المستحيل بالنسبة له فى المرحله دى انه ممكن يقرب من ايدك علشان ياكل الاكل دا) وليكن مثلا فاكهه او وصفة البيض بالبقسماط او خضار . حط له الاكل اللى عجبة مرة او اتنين وبعدين شيلها من طبق الاكل وقدم الوجبة دى بصابعك من برا القفص للطائر ممكن يتردد شويه بس فى الاخر هايجى
ابدأ بأنك تعودة على انه ياكل من ايدك من برا القفص
بلل صابعك فى الماء واغمسها فى الحبوب اللى فى قفصة (الحبوب المعتاده) وباردوا دخل صابعك من برا القفص هاتلاقيه بياكل من صابعك
شويه شويه وابدأ دخل ايدك وحط فيها الوجبة المفضلة له
واهم حاجة الصبر ثم الصبر

5: بعد فترة من المرحله الرابعة هاتلاقى الطائر بينزل على ايدك مش علشان ياكل علشان يكتشف ايه دا وهايبدأ بطريقة الاكتشاف اللى عندة وهى (العض والنقر) للاسف هاتضطر تستحمل العضات اللى فعلا ساعات بتبقى مؤلمه بس لو انت شلت ايدك بمجرد انه عضك هايفهم ان دى الطريقة اللى هايعد ايدك بيها كل ما هدخلها
استحمل العض لوقت قصير ولما الطائر هايعرف ان ايدك مش مصدر للخطر هايبطل يعضك

افتكر كويس ان العلاقة اللى بينكوا هاتتكون من حبك للطائر دا وفهمك لنفسية الطائر
والطائر بيحس اذا كنت انت بتحبة ولا لآ
والعلاقة والترويض استحاله تكون بالتجويع او الاجبار لانها استحاله تكون علاقة ثقة حقيقية
اما لو الطائر هو اللى جه لك بنفسة وارادته وانت استنيت منه كدا بتقديم الامان والحب له
يبقى هى دى العلاقة الصحيحة
وياريت يكون موضوع المتواضع وخبرتى القليله جدا مفيد ولو لشخص واحد
وشكرا جزيلا لكم