اشترك في نشرتنا البريدية ليصلك كل جديد

بنت دبي · 07-08-2006, 02:20 PM

الحين ببدأ بكتابة كل المعلومات الي يحتاجها الفارس المبتدأ في الكرت الاحمر ....

اول الشي لازم يتعود الفارس على كل الخيول سواء كانت شرسة ولى تعبانة ولى عادية ..
اول مايركب الفارس على طول يسيير يسار الخيل ويركب بريله اليسار ولازم يطول الركابة اليسار وبعد مايركب الفارس الخيل يعدل الركابات على قياس ريله ولازم يكون كعب ريله على تحت وحديدة الركابة لازم اتكون عند اصابع ريل الفارس وبعدين يقصر الحبل الي هو الرين وطبعا في مصطلحات وكلمات تستخدم في الفروسية وانا الحين بذكرها....
الكلمة الاولى هي تروت وهو الركض العادي مب السريع
الكلمة الثانية وهي كانتر وهو الركض السريع
وفي صوت خاص يستخدم للخيل بس الصراحة انا ماعرف كيف اوصفه بس اسألوا اي فارس وبيخبركم عنه ....
والكلمة الثالثة وهي جامبينج سيت وهي جلسة القفز هاي الجلسة بعدين بقولكم عنها
والحين ببدأ في التدريب....
بعد مايركب الفارس الخيل يظرب الحصان بريله على بطنه علشان يمشي بس ظربه عادية مع صوت واهم شي علشان انغير الاتجاه لازم انقصر الحبل على قياس رقبة الخيل وبعدين نغير الاتجاه اول شي نطلع ويالحصان مشي عادي علشان يسخن واذا طلعتوا على طول ركض مب زين حق صحت الحصان وخاصتا حق قلبه والركض بيكون على هالشكل .... لازم الظهر يكون على ورى ومستقيم وريلك لازم اتكون مشدودة على السرج وكعب ريلك لازم يكون على تحت وراسك يكون سيدة ولازم تتطالع جدام لان الحصان يعرف انت وينتتطالع اذا كنت تتطالع يمين وانتوا كان مشيكم مشتقيم فهو بيفكر ان انت تبغيه يلف يمين فبيلف يمين فلازم تتطالع سيدة وعند الركض لازم تتطلع مع الحصان اب وداون فوق وتحت يمكن الحين ماتفهمون شو فوق وتحت بس يوم بطبقونه بتعرفون شقايل تتطلعون مع الحصان فوق وتحت هذا الشي اتسونه بس عند التروت هو الركض العادي وفي حركات يتعلمها المبتدأ وهي اول شي يخلي الحصان يمشي عادي والفارس يترك الحبل ويرفع ايده وبعدين الفارس يخلي الحصان يركض تروت عادي والفارس تارك الحبل هاي اول حركة وثاني حركه خلي الفارس ايده ورى ظهرة والحصان يركض تروت .

وهاي كل الاشياء الموجودة في الكرت الاحمر الي حاب يعلمها مستحيل يطبقها من اول مرة الكرت الاحمر فيه 26 بطاقة يعني 26 يوم فلازم يحاول يطبق قوانين هذا الكرت بالكثير شهر .....
ولازم الفارس مايحسس الخيل انه خايف منه واذا عاند الخيل لازم الفارس يكسر عناده لازم الفارس يحسس الخيل انه اقوى منه ولايعتمد الفارس اكثر شي على العصا هذا الشي يخلي الخيل يمشي الفارس على كيفه لان الخيل بيفكر وبيقول هذا الي يركب علي اكيد خايف مني علشان جذي يظربني بالعصا فلازم يزم تبغي تظربه اظربه بريلك واستخدم العصا بس لاتعتمد عليها .

وهذا كل شي الي اعرفه عن الكرت الاحمر ....