قطي صار شرس بعد عمر دام اكثر من 6 سنين !!

[وعد ~~]

السلام عليكم ورحمة الله وبركاته
كل عام وانتم بخير وعسى الله يعيده علينا وعليكم بالصحه والعافيه

اخواني اخواتي طلبتكم ابي الفزعه لان بجد ماني عارفه كيف اتصرف مع قطي واهلي بدأو يكرهونه ..

سلمكم الله انا قطوي فارسي ذكر ربيته من عمره شهرين والى الان تم عمره 7 سنين معاي ولله الحمد
عشت معاه احلا حياه قط جدا اليف مسالم لعوب مطيع وهادي بنفس الوقت

صار لي ظرف اني اسافر للعلاج برا البلاد واضطريت اني اتركه بالفندقه لمدة تقريبا 3 اسابيع ماعندي احد يهتم فيه , فحينها كان عمره خمس سنوات

فحطيته بفندقة موقعها بالرياض , سلمكم الله هالمكان وصوني ناس عليه وقالوا انهم يهتمون بالقطاوه حيل وكذا فطمأن قلبي سلمت امري لله وحطيته هناك

وربي اللي خلقني يوم رجعت له بكيت بكي, سوا حركات غصب الواحد عيونه تدمع
من شافني قام يصرخ ويضرب القفص لين جيته وتخبا تحت ايديني كانه يقول خوذيني مابي هالمكان
كلمني صاحب هالمحل وقال لي قطوي ماياكل ولا يشرب ولا يخالط القطط الثانيه كان جدا انطوائي طول ماتركته وكانوا ينومونه ويعطونه مغذي عشان يعيش
والشي اللي صدمني وماصدفت كلامهم قال ان قطوي هجم عالعاملين بالمحل
وقال قطوي متوحش واني ماعنطيته ابرة سعار , مع العلم قطوي تميت كل تطعيماته من اهو صغير لين كبر تعجبت من كلام الطبيب وقلت له انا مااصدقك هذا قطوي ربيته من نعومة اظافره , اخرتها الطبيب بس مسح عليه ماصدقت اللي شفته قطوي هجم عليه وعض ايده بطريقة جدا وحشيه سببت نزيف شديد له , مع العلم معاي جدا حبّوب وطيب وقتها بس يبي يتخبا تحتي ولا يبي يشوف احد , قال لي البيطري لازم نضربه ابرة سعار لان القط حالته صعبه , تشاجرت معاه وقلت له اني تميت تطعيماته مااهتم لكلامي وقال قطي متوحش لازم ابره , عالعموم اخذه هالبره وربي نفس حالته ماتغير وهاجم الرجال كمان مره بعد اسبوعين من جيت اخذته من الفندقه

بعدها اخذته للبيت وكملت حياتي وياه لكن في اشياء كثيره تغيرت فيه
صاير جدا شرس , مو بتحركاته بس بالتصرف المفاجئ
لما امسح عليه او امشط شعره فجأه يعضني عض قوي او يمشخمي بقوه مع اني اصرخ ويبتعد واحس من نظراته بتأنيب الضمير يعني فاهم انه غلطان ,قمت اجهز بخاخ مويه معاي عشان لما يهجم ابخ عليه
مهما امشطه او امسح عليه وربي فجأه يعض بطريقة سريعه جدا مايمديني اسوي ردة فعل عليها
اكله سليم وتبرزه سليم مع انه من بعد اخر سنتين صاير نحيف جدا بس اكله جدا سليم ونومه كمان

صاير مثل الكلب اعزكم الله مايحب الغرب وممكن يهجم عليهم بس يعرف لاهلي وهادي معهم بس مع ضيوف لا! احد غريب يبخ عليهم ويبين انه بيهجم لو احد قرب منه

الحين اهلي خايفين منه شافوا ايديني جدا متمشخه بسببه وكلمالها وحالته تسوء
صبرت سنتين بعد هالحادثه ولسه اعاني من ردات فعله الشرسه الغير متوقعه
مع العلم انه للحين يعرفني وكلمه ويستجيب وادربه على اوامر اجلس وقف موت كلها تمام وسامع الكلام ودايما عيونه بعيوني تواصلي معاه جدا سليم وين مااروح يجي ويلحقني حتى لما اروح الدوام ينتظرني عند باب المجلس بس عشان ادخل ويشوفني بجد هالقط مره يحبني الله يحفظه

طلبتكم ساعدوني ماني عارفه شسوي الحين قطي مااقدر حتى اوديه البيطري لانه يهجم هجوم ممكن يأذيهم بطريقه مو زينه ابدا

طلبتكم بهالشهر الفضيل وعسى اللي يساعدني بكم نصيحه او طريقة ربي يرزقه اللي يتمنى
اسمحولي عالقصه الطويله الممله بس وربي انا نفسي ماني عارفه ليش تغير قلت اقول لكم اللي اعرفه عشان تفيدوني

انتظركم