استفسار بخصوص الفقاسه ( مبتدئ )

[ذيب جدة]

احب اهنيكم على حب فعل الخير ومساعدة جميع مبتدئ في مشروع الفقاسه والله يجزاكم خير
وانا في الحقيقة ماكتبت موضوعي الا بعد ما تعبت من التصفح ولقيت بعض المعلومات اللي تفيدني
وبعضها للحين ماعرفها وان شاء الله تفيدوني ،

والاستفسارات هي :


1- لقيت فقاسه ايطالية سعة 100 بيضة بمبلغ 1500 ريال ، ولقيت وطنية 500 بيضة بمبلغ 550 ريال وتايلندية 42 بيضه بمبلغ 1200 كلها اتوماتيك
فأيش تنصحونـي الوطنية او الايطالية او التايلندية ؟

2- لو حطيت في البداية 50 بيضه وكل بعد اسبوع عادي اقدر اقتح باب الفقاسه واحط خمسين ثانيه يعني كل ماجمعت بيض حطيته بالفقاسه ويصير عندي الفقس مايوقف
كل بعد فتره تفقس المجموعه اللي حطيتها او هالحركه تفسد البيض وتقلل من التفقيس ؟


3- بخصوص مكان الفقاسه ودرجة الحرارة وين تنصحوني احطها ، لازم احطها في غرفه مضلله ولا عادي في سطح المنزل او في الحوش ؟


4- وش الدجاج او الصيصان المرغوبه في السوق ( براهما ولا بلدي ) ؟ وايش تنصحوني بخصوص شراء اطباق بيض مخصب زينه تمشي ولا اربي دجاج ؟


واسف جدا جدا على الاطاله اعذروني يا اخوان واتمنى الرزق و التوفيق للجميع
تكفون ردو علينا ودي من بكره اخلص اموري

اخوكم ذيب جده

[عآفك آلخآطر]

زين يوم انك حطيت الاسئلة لاني انا بعد مبتدأ وابا معلومات
ان شاء الله حد يفيدنا

[جنوبي0565]

قسم اني مثلكم وعندي سوال لو البيض عدا عليه اسبوع بعدين دخلته الفقاسه كله يفقس في يوم واحد ولالا

[ذيب جدة]

ان شاء الله يكون الطرح مفيد لاغلب الشباب

وكلنا ننتظر اهل الخبره واهل الفزعات

سؤالك رهيب يآ اخي جنوبـي 10 على 10

بانتظار اختنا صمت الامل ولايهونون الباقين على روسنا من فوق

اخوكم ذيب

[جنوبي0565]

يالله اي واحد يرد

[ابـ اروى ـو]

المشاركة الأصلية كتبت بواسطة ذيب حدة

احب اهنيكم على حب فعل الخير ومساعدة جميع مبتدئ في مشروع الفقاسه والله يجزاكم خير
وانا في الحقيقة ماكتبت موضوعي الا بعد ما تعبت من التصفح ولقيت بعض المعلومات اللي تفيدني
وبعضها للحين ماعرفها وان شاء الله تفيدوني ،

والاستفسارات هي :

هلا بك اخوي وحياك ربي بين ربعك واخوانك
ونسعد كثيرا انا نساعدكم وننقل لكم خبرتنا وتستفيدو منا والله يرزقنا واياكم أمين يارب العالمين
بخصوص سؤالك الاول

المشاركة الأصلية كتبت بواسطة ذيب حدة

1- لقيت فقاسه ايطالية سعة 100 بيضة بمبلغ 1500 ريال ، ولقيت وطنية 500 بيضة بمبلغ 550 ريال وتايلندية 42 بيضه بمبلغ 1200 كلها اتوماتيك
فأيش تنصحونـي الوطنية او الايطالية او التايلندية ؟

عني انا جربت الايطاليه 160 و 500 بيضه ومافيها كلام
وجربت الوطنيه 500 بيضه بموصفات الايطاليه وقريبه منها جدا عمل متقن لكن كان سعرها 2800 ريال
ما تفرقها عن الايطاليه من ناحية الجوده
اما التايلنديه
ما جربتها والله
وعشان اشير عليك ويش تختار الايطاليه ما فيها كلام الوطنيه تعتمد على اتقان الصنعه بموصفات ومقاييس ومن سعرها الي انت ذكرته شكلها الله بالخير
التيلنديه اعذرني ما جربتها

اما بخصوص السؤال الثاني

المشاركة الأصلية كتبت بواسطة ذيب حدة

2- لو حطيت في البداية 50 بيضه وكل بعد اسبوع عادي اقدر اقتح باب الفقاسه واحط خمسين ثانيه يعني كل ماجمعت بيض حطيته بالفقاسه ويصير عندي الفقس مايوقف
كل بعد فتره تفقس المجموعه اللي حطيتها او هالحركه تفسد البيض وتقلل من التفقيس ؟

هو عادي تحط البيض على دفعات وانت بتفتح الفقاسه كل يومين تشيك على الماء وعلى مروحة الهواء ما فيه مشكله
لكن يجب ان ترص البيض خارجا في الصينيه وتكتب عليها تاريخ اليوم الي بتحطهن في الفقاسه وتفتح الفقاسه وتحطهن داخلها بسرعه يعني لا تطول وانت فاتح باب الفقاسه
لكن بتواجه مشكله عند اخراج الصوص من الفقاسه فهي تستغرق وقت اطول ويكون بيض الدفعات التاليه في فتره حرجه ما يتحمل التذبذب في درجة الحراره مما يضر بالجنين وتقل نسبة الفقس
وكذلك ستواجه مشكله بعد الفقس في عملية الحضانه لانه بيكون عندك اعمار مختلفه وبيكون عندك الافتراس باعلى نسبه لانه الكبير بيعتدى على الصغير
وكمان بتواجه مشكله في التغذيه اذا بستعمل العلائق الجاهزه لانه هناك بادئ ومرحله 2 وناهي
كمان بتواجه مشكلة في البرنامج الوقائي كالتطعيمات والفيتامينات والمضادات الحيويه
لذا انصحك انك تعبي الفقاسه مره وحده وما تحط البيض على دفعات من واقع تجربه

اخي الحبيب بخصوص استفسارك الثالث

المشاركة الأصلية كتبت بواسطة ذيب حدة

3- بخصوص مكان الفقاسه ودرجة الحرارة وين تنصحوني احطها ، لازم احطها في غرفه مضلله ولا عادي في سطح المنزل او في الحوش ؟

اما الفقاسه فهي تحتاج غرفه مظلله ومكيفه( يكفيك مكيف صحراوي) تقيها من تقلبات الاجواء ومن الشمس والامطار والغبار

اما بخصوص استفسارك الرابع

المشاركة الأصلية كتبت بواسطة ذيب حدة

4- وش الدجاج او الصيصان المرغوبه في السوق ( براهما ولا بلدي ) ؟ وايش تنصحوني بخصوص شراء اطباق بيض مخصب زينه تمشي ولا اربي دجاج ؟

الكل فيه خير والكل مطلوب لكن اذا باعداد كبيره مافيه مثل البلدي
اما الدجاج الفاخر اذا الله رزقك مستويات توب بسعرها فيها
بالنسبه لشرائك للبيض او للدجاج فيعتمد على المصدر اللي انت بتشتري منه هو ثقه ومستوياته مذكوره بالخير والا حي الله
فإذا المصدر موثوق فالبيض بيكون ارخص بس يحتاج لك وقت عشان ينتج عندك

المشاركة الأصلية كتبت بواسطة ذيب حدة

واسف جدا جدا على الاطاله اعذروني يا اخوان واتمنى الرزق و التوفيق للجميع
تكفون ردو علينا ودي من بكره اخلص اموري

اخوكم ذيب جده

ابد حياك الله وما سجلنا في هالصرح هالعظيم الا لنفيد ونستفيد
اتمنى اني رديت عليك رد وافي كافي ويمكن الاخوان ما يقصرون معاك اللي عنده إضافه بيحطها

[ابـ اروى ـو]

المشاركة الأصلية كتبت بواسطة جنوبي0565

قسم اني مثلكم وعندي سوال لو البيض عدا عليه اسبوع بعدين دخلته الفقاسه كله يفقس في يوم واحد ولالا

هلا بالحبيب
اتمنى اني استطعت إيصال المعلومه لكم
اما بخصوص سؤالك اذا كان مخزن بطريقه سليمه بدرجة حراره منخفضه نسبيا اي لم يتكون الجنين بعد
فهو سيفقس بفتره زمنيه متقاربه اما ان كان تخزينه بطريقه غير صحيحه وبدرجات حراره قريبه من درجة الحضانه هنا ستجد بعض البيض فقس قبل موعده واخر خرب ( مرج )
اتمنى جاوبتك على استفسارك
تقبل تحياتي

[ذيب جدة]

ابو اروي


بخصوص فترة الحضانه عندنا مزرعه قريبه من البحر حول 2 _ 3 كيلو يعني الجو فيها شبه لطيف
هل تصلح مكان للحضانه ؟ او تنصحني اضبط لهم مكان بنفس الغرفه اللي بحط فيها الفقاسه



اشهد انك ماقصرت كفيت ووفيت والله يعطيك العافيه ويوسع رزقك
ويجزاك خير في الدنيا والاخره



اخوك ذيب

[صمت الأمل]

أخي العزيز ابو اروى :


تصدق اني انقهرت لما شفت ردكـ ؟؟


تدري ليش ؟؟














لأن واللهـ ماعندي غير ختم الرد المميز لردكـ الرائع .


جزاكـ ربي بالجنهـ ماتركت لي شيء اقولهـ أو أعلق عليهـ ..


ماعندي غير اني أأيد على كلامكـ 1000% ,, خصوصا على الفقاسهـ .


أخي العزيز ذيب حدهـ :


ارجوكـ لاتتركـ السعر يلعب براسكـ .. ترى الرخيص لهـ عواقب كبيرهـ ..


اذا كان تفكيركـ وتخطيطكـ للتفقيس والتجارهـ بالدواجن ,, خطط صح وابدأ صح .


اشتري شيء مضمون وممتاز ويعيش معكـ لفترهـ طويلهـ بإذن اللهـ وبدون ماتشيل هم الأعطال أو التشوهات .


صحيح السعر شوي عالي .. لكن أنت ماراح تشتري فقاسهـ كل يوم أو حتى كل سنهـ ..


والإيطاليهـ ماعليها غبار أو كلام .


وخليكـ حاليا مع ابو أروى بما انهـ بدأ معكـ وسبقني اللهـ يجزاهـ خير وتوكل على اللهـ وطبق نصائحهـ .


متابعهـ معكم دوما .

[ذيب جدة]

الله يعطيكم العافيه على نصائحكم الطيبه اللي اكيد راح تكون في محل اهتمامي

اتمنى اني ما ازعجكم باستفساراتي لكن ماقول الا الله يجزاكم كل خير

انا اكيد ابحث عن المكسب الايطالية لقيت جديده 1500 ومستعملة 700 ريال ، هل تنصحوني بالمستعمله بما ان ماعليها غباار


مع التفكير الطويل بهذه الفكره تولد اسئله جديده واتمنى منكم معذرتي

وان شاء الله يستفيد منها كل من يمر من هنا


استفساراتي هذه بخصوص ( فترة الحضانه )

اول استفسار كان قبل رد الاحت صمت الامل

وهو بخصوص المكان المزرعه واجوائها تؤثر على الصيصان علما اني افكر ابني لها غرفه خشبيه ( صندقه )
لأن غرفة السطح فيها مشكلة راح ابينها في الاستفسار الثاني

ثاني استفسار
جنب بينتا مخبز والمدخنه لاصقه في جدار السطح وبعيده عن الغرفه حدود 5 امتار هل تؤثر على الصيصان في اول شهرين ولا باب الغرفه يحل المشكله باغلاقه .


بأنتظار اخي المبدع ابو اروي وبانتظار اختي المبدعة صمت الامل وبانتظار كل من يتحملني
والله يجزاكم خير في الدنيا والاخره ان شاء الله

اخوكم ذيب جده