سؤال عاجل بخصوص الباراسيتامول

[منــــة]

السلام عليكم
انا بحب القطط جدا بس ماعرفش اراعيهم الرعاية اللازمة للأسف : ( قطي كان بيكح وموش عارف يبلع ونشاطه قل من حوالي يومين وللأسف معرفتش اوديه لدكتور وطمني حبة انه ابتدا ياكل ويتحرك ويروق بس تعبان برضه يعني ودلوقتي من حوالي اربع ساعات لقيت باطن رجله وودانه سخنين ..اتخضيت واديتله 1 مللتر او نص مللتر موش قادره افتكر من لخبطتي بارامول اطفال تركيزه ضعيف وده لجهلي للأسف  ..وبعدها دخلت اقرا عن الكحة والسخونية للقطط واتصطدمت ان اي باراسيتامول بأقل جرعة قاتل وسام للقطط : ( ومفهمتش كويس لان كل المواقع اللي بتتكلم باستفاضة موش عربية..اللي فهمته ان مفيش خالص اي جرعة آمنة للقطط ..وان اقل جرعة سامة من 50 ل 100 مجم باراسيتامول لكل كجم من وزن القط.. وانا بحسب تركيز الدوا اللي ادتهوله يبقى اديته 20 مجم او اقل  و هو عنده 8 شهور ووزنه حوالي 4-5 كجم .....الجرعة متطمنش خالص يعني ((( االقط اول مااديته الجرعة ديه حرارته نزلت "معنديش ترمومتر" ولحد دلوقتي "ربنا يستر" مفيش من اعراض التسمم اللي قريتها حاجة ..بس همدان لسه وبرضه بيكح طبعا ((
انا موش عارفه بحكي ليه ..انا بس عارفه اني موش حاعرف كمان بكره اروح للدكتور ..انصحوني اديله ايه لو فضل كده مفيش اعراض تسمم يعني بس لسه تعبان ...اديله ادوية برد وسخونية للقطط ولا اوقف كل حاجة لحد مااروح للدكتور حتى لو متأخرة؟

[شاهستا]

وعليكم السلام ورحمه الله

اهلا بيكى منه

لو لاحظتى اى ترجيع على القط او تشنجات

تروحى للصيدليه البشريه بسرعه جدا

وتجيبى اى دوا تركيبه ديهيستامين /مضاد تحسس بشرى مقدار 10/3 من ابره الانسولين

مره واحده فى اليوم عند اللزوم

او لو مالقتيش ده تجيبى

مضاد اعراض تسسمم اسعافى ( ايتافيلين ) تركيبه aceplfylline

مقدار 10/2 من ابره الانسولين

بس ان شاء الله القط ميحصلوش حاجه واتمنى متديهوش اى علاج تانى غير لما تتأكدى انه آمن

----------------

بالنسبه لحرارته العاليه مش هقدر افيدك بحاجه غير لما تقيسى درجه حرارته

وعلاج الحراره العاليه ( نوفالجين للاطفال ) 1سم مره فى اليوم

وقبل كل مره تديله العلاج فيها ضرورى تقيسى درجه الحراره

لكن حاليا ضرورى القط ياخد مضاد حيوى ايموكس لاطفال من الصيدليه البشريه

2 سم مره فى اليوم

[منــــة]

شاهستا ربنا يعزك ويطمن بالك ..شكرا ع الرد ..حاعمل باللي قلتيه ان شاء الله
القط قام دلوقتي واكل ولعب شوية الحمد لله ..ومفيش حرارة بس هو مقاوح ومجنون واي حبة فوقان بتشتغل جنونته حتى وهو تعبان
حاديله المضاد الصبح إن شاء الله ولو سخن حاديله النوفالجين ولو ربنا سهل حادويه للدكتور كمان
الحمد لله ربنا يجملها بالستر : )

الكحة اللي عنده علاجها عادي ضمنيا ف المضاد ؟ ..هي اصلا لها اثر قديم من اختناق بقطعة لحمة جامدة شوية الدكتورة ساعتها اضطرت تلعب كتير ف زوره وتديله محلول مالح عشان يرجع وده ساب اثر ف البلع والكحة والرئة ..بس بتختفي خالص وبننساها

[شاهستا]

ان شاء الله كل حاجه هتتظبط على المضاد

ومادام مفيش تاثر لتسمم مش مهم توديه لدكتور وامشى على العلاج الى كتبتهولك

والنوفالجين حرسى منه لانه تقيل على المعدة

يعنى فى حالات الضرورة فقط ولما تتاكدى ان حرارته عاليه

وضرورى تهتمى بتغذيه القط حتى لو هو رفض الاكل تاكليه بالعافيه

[فاتـــو]

اهلين ياعسل
لازم تخلين بالك قبل ماتسوين اي شي
يعني اعطيتيها دواء غلط واكلتيها قطعه كبيره تسببت في كحه مزمنه
هذي روح وبنتحاسب عليها لازم نكون مسؤولين شوي
شوفي انصحك تودينها لطبيب غير الدكتوره السابقه اكيد بيلاقي حل للحلق وهذا على حسب حالتها

الله يشفيها لك وماتشوف شر ان شاء الله