|
رد: مشكلة خوف البادجي ؟
السلام عليكم
الأفضل وقبل ماتفكر في تجهيز الزوج للإنتاج والتفريخ
تعطي طيورك فرصة تتعود عالمكان وعليك كمربي لها
وتطمن لوجودك حولها وتعرف إنك ماتشكل أي خطر عليها
مسألة توالف زوج البادجي مع بعضها مومشكلة
طيور البادجي طيور سريعة التوالف والتأقلم
أرجع لأول نقطة وأوضحلك السبب
في حال أستعجلت وقدمت الإنتاج حتواجهك كم مشكلة
في مرحلة الحضن والتفريخ إنته محتاج تطمن على وضع البيض والفروخ
بس طول مالأنثى قلقانه من ناحيتك أي حركة منك حتخليها في خوف
ممكن تجلس في العش على البيض وتخاف تطلع وتسيبهم
ولو طلعت للأكل مثلاً ولمحتك حتجري للعش وممكن في دي اللحظة تكسر البيض
ونفس الشيء لو فكرت تفتح باب البياضة عشان تطمن على وضع البيض
ساعات ممكن تهجر العش والبيض عشان حست بالتهديد
نيجي لو عدينا مرحلة البيض وصار عندك فروخ
في حالة الفروخ نحنا محتاجين ننظف العش ونطمن على صحة الفروخ بشكل مستمر
ودا صعب مع أنثى خايفة وقلقانه والحل نبدأ مع الزوج ونمنع الخوف اللي فيهم
أول شيء تحط القفص في مكان مافيه حركة كتيرة ومفاجئه
بعدها ولمن تحط الأكل أو تنظف بكل هدوء وزي ماتسوي إنته
ولمن تخلص تجلس عندهم بدون إزعاج ولمن تحس إنهم ماصاروا يخافوا من وجودك
بعدها تبدأ معاهم بالتجويع 4 ساعات وبعدها تدخل يدك وفيها الحبوب بشويش وبدون حركة
في الأول ممكن تتعب ويطول الوقت وإنته تستنى لومالقيت إستجابة خلاص حط الأكل وحاول وقت تاني
ومرا عن مرا حتفرق ودي الطريقة أنا الحمدلله مجربتها مع طيوري ولقيت نتيجة وإن شاءالله إنته كمان حتجربها وتنجح
وبالتوفيق يارب
__________________
سبحــان الله وبحمده سبحــان الله العظيم
شكراً " رونق حجازيه " على التصاميم الحلوة ♡♡
|