|
عصفورتي باضت لأول مره بيض غير مخصب .. افيدوني
بسم الله الرحمن الرحيم
السلام عليكم اخواني واخواتي
كنت اشتريت ذكر وانثى سن 5 شهور من شهرين تقريبا وللأسف مات الذكر
وبسبب عدم وجود اماكن كافيه وضعت الانثى مع ذكر تاني اكبر منها بشهرين ( مع العلم ان اخته في نفس العش باضت يوم 4 ديسمبر وفقست الحمد لله )
المشكله ان الذكر من بعد ما طلع ريشه رجع وقع تاني وبيطلع بصعوبه ومالوش ريش في جناحاته ولا ذيله ومعظم الرأس لكن بينط ويتحرك من مكان لمكان عن طريق منقاره
المهم العصفوره فجأه باضت يوم 4 يناير ووضعت حتى الان 3 بيضات
فحصتهم بالكشاف لأني شاكه في مقدره الذكر على التخصيب وفعلا لقيتهم مش مخصبين ووقعت مني واحده اتشرخت وفعلا لقيتها مش مخصبه
دلوقتي انا حشتري لها ذكر شغال بإذن الله لما اسافر كمان يومين لكن عايزه اعرف هل الصح اني اضعه معاها الان بدلا من الذكر الموجود ولا استنى لما تكتشف ان البيض بدون جنين وتتركه؟ ولا اتخلص من البيض واتركها مع الذكر الجديد فتره ولا اعمل ايه بالظبط؟ انا محتاره لأنها هي والذكر مولفين مع بعض وكان نفسي اني مفصلهمش عن بعض لكن صعبان عليا تبيض وترقد بدون فايده
وهو تعبت معاه مش عارفه له علاج
سؤالي الثاني بعد اذنكم
عصفورتي الام الاصليه كنت عزلتها عن الذكر لأنها بتتخانق معاه وقت الفقس وبتتسبب في موت الفراخ
حاليا هي في فتره راحه والذكر بتاعها مع انثى اخرى باضت لأول مره وهو بيساعدها في التأكيل ومولفين جدا مع بعض ومطلعين الوان حلوه ماشاء الله
المشكله انهم حيتجننوا على بعض وبيفضلوا شايفين بعض ويغردوا وعايزين يروحوا لبعض وانا عايزه اجيبلها ذكر شغال مختلف لأنهم مش بيطلعوا غير ازرق واخضر عاديين جربتهم 4 اعشاش طلعوا 5 ازرق عادي و3 اخضر عادي غير اللي ماتوا
هي خضرا تشبه للعاديه لكن جناحتها مش كلها اسود فيها قليل والذكر كان ابيض فيه لبني ورصاصي بسيط واسفه اني معرفش في تصنيفهم
ياترى اجيبلها ذكر لونه ايه يمكن يطلعوا الوان حلوه جديده؟ وللا ادخل لها الذكر لحد ما تبيض وترقد وبعدين ارجعه لوليفته الموجود معاها الان؟ (لاحظوا انه بيأكل معاها وهي اصلا رجلها معووجه وبيساعدها)
اشكركم مقدما
|