[الدلع]

وعليكم السلام ورحمة الله وبركاته
حياك الله وتسلمين حبيبتي
يعني للحين ما جبتي البسة .. أنا أذكر انك ذكرتِ انهم اقتنعوا فوش غير رايهم مع انك بتتكفلين بالبسة من الالف للياء
بالنسبة لي أحس إن راي الوالدة له تأثير كبير على دخول الحيوانات للبيت ومنهم البسس فإن كانت مقتنعة وراضية هانت كل الأمور وبيرضى الوالد لو كان رافض للفكرة وبقية الأهل فتحتاجين توصلين لقلبها قبل أي شخص ثاني فاحرصي على انك تتوددين لها وتكلمينها باسلوب لطيف خالي من العصبية والزعل لأنك ما راح تستفيدين شي وبيضل رايها ويمكن تعاند لأن اسلوبك مو مناسب وفيه تشنج وهذا ما يخدم أبدا الموضوع الي لك فترة وانتِ تراكضين وراه وتتمنين يتحقق ولا تنسين انها والدتك ولها عليك حق الطاعة والاحترام وبرضاها تهون كل الأمور وتتيسر وحتى لو ما رضت فالله عز وجل يقول ( وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وانتم لا تعلمون ) .
الأخوات في السابق أعطوك كذا حل ويبدو إن الأهل ما زالوا يحتاجون منك عمل ومجهود حتى تغيرين الفكرة السيئة الي ماخذينها عن بستك القديمة ( إلا على فكرة وش صار للبسة القديمة كرشتوها ولا شي ثاني )
شوفي يا عزيزتي كلنا مرينا بذا العقبة قبل ما نجيب بسسنا وكل واحد فينا مختلف عن الثاني ففيه الي كل عائلته رافضين ويبدو انك من ذا النوع وفيه الي نص ونص وهذي ممكن التغلب عليها لو كانت الوالدة في صف الي يبي يجيب البسة لكن لو كانت الوالدة معارضة فتحتاج مجهود لحد ما ترضى وتقتنع وهذا يعتمد أولا وأخيرا على الأسلوب في طرح الطلب وتقديم التعهدات بالنظافة والمحافظة على الأثاث وغيرها وهذا هو الي تشتكين منه والخوف منه هو سبب رفضهم لرغبتك الشديدة في شراء بسة .
أنا عن نفسي العقبة الوحيدة الي كانت تواجهني هي رفض الوالد لأنه خايف من ان البساس توصخ البيت أما ما يخص باقي الأهل ومنهم الوالدة فما عندهم مانع والوالدة جايبة ببغاء من قبل وبما اني حرمة راشدة ولست طفلة أو في سن مراهقة وقايسة قبل ما أغوص وموفرة جميع احتياجاتهم ومتكفلة بكل مصاريفهم وقد ربيت بساس قبل كذا فجبتهم بشكل مفاجئ للكل ومن دون ما أقول لهم ـ هم يدرون اني بجيب لكن ما توقعوا اني اسويها فعلا لأن هذا يعتبر من الامور المستحيلة بعد ما طلّع الوالد البساس الي قبل والجميع تقبل ما عدا الوالد ولأني عارفة ان الوالد يحتاج انه يشوف على الطبيعة حتى يقتنع ما كان عندي ذاك الخوف من ردة فعله لأني كنت متأكدة انه بيغير رايه ويقبل وفعلا رضى لما لاحظ ان الي كان خايف منه ما حصل ( هو في البداية واجهتني مشكلة الرمل ونوعيته الي ما تسبب ريحة لكن الحمد لله حليتها ) .
بالنسبة للأثاث فما يحتاج مريت بذا المشكلة لأن ذا الحركة طبيعية في الكل ) لكن ممكن الحد منها للي متأذي بزيادة هي قص مخالب البسة كل اسبوعين أو تركيب مخالب ناعمة وتختارين النوع الشفاف حتى ما يلفت نظر البسة وتحاول تقطّعة أو تسوين عدد من أعمدة الخدش وتحطينها في الأماكن الي معروف ان البسة تخربش فيها الأثاث .. أنا عندي وحدة تخربش الأثاث والثانية الأبواب والجدران والثانية أرحم لأن الابواب والجدران مصبوغة وناعمة فلو طالت المخالب تتزحلق ولا تكون ثابتة مثل ماهو صاير على الأثاث .
أما فيما يخص الشعر فبتكون المشكلة أخف مع البسس الي شعرها قصير فلا تدخلين أي قطوة للبيت حتى تعرضينها على البيطري حتى ولو كان شكلها من الخارج ما يوحي بأي مشاكل عشان يشوف لو فيها تساقط ملحوظ أو أي مشكلة صحية حتى انك تتفادينها وتحافظين على صحتك وصحة الأهل وعموما انتبهي على بستك من الفطريات والديدان واحرصي على الاكل الصحي البيتي وما في ما نع من الدراي فود الخاص بالجلد والشعر وأيضا الفيتامينات المفيدة لذا الشي ومشطي شعرها يوميا في غرفتك حتى يطلع الشعر الزايد وحتى ما تكون حجة بأن شعر بستك يتساقط في كل مكان .وخصوصا في أماكن تواجدهم باستمرار .
أنا عن نفسي ما يهمني أكثر شي الا صحة والديني فما دام ما فيهم ربو فالحمد لله هذا أهم شي على أساس ان بسسي نظاف ومطعمين وحريصة عليهم
شوفي يا عزيزتي لو حصل وان شاء الله يحصل ان الأهل وافقوا فحاولي على قد ما تقدرين
تبعدين البسة عن أكثر شخص كان رافض لدخولها للبيت لأنه قد يكون لا زال في نفسه كره لذا الشي وانه ما وافق الا تحت الضغط حتى ما تصير هوشات كل شوي انتِ في غنى عنها وبدل ما تستانسين بالبسة تنقلب حياتك نكد ويمكن لا سمح الله تتخلصون منها
موفقة حبيبتي واحنا في انتظار الاخبار الطيبة وان شاء الله ما تطول السالفة ويرضون الأهل وتجيبين البسة الي نفسك فيها ونشوف صورتها في المنتدى