[gumball]

ازيكم يارب يكون الجميع بخير
هتكلم معاكم عن موضوع مهم جدا وهو

( ازاى نخلى طيور البادجى يتوالفوا علشان يتم التزاوج بينهم )


دى مشكله بتواجه كثير من المربيين وهى عدم توالف الطيور ممكن الذكر يكون بيضرب الانثى او العكس
بس عند ناس كتير بتبقى المشكله من الاناث

وده ممكن يبقى ليه كذا سبب

ممكن تكون الانثى شرسه ودى طبيعتها اصلا ومش هتتغير لازم يبقى معاها ذكر اشرس منها واقوى منها وده الاحسن نستغنى عنها ونجيب انثى تانيه

ممكن يكون الذكر ناضج والانثى غير ناضجه بمعنى الذكر عايز يتجوز والانثى لسه مش عايزه تتجوز لصغر سنها مثلا والانثى لو لون الكير بتاعها بنى وقتها نعرف انها ناضجه اما لو لون الكير بنى مشوب ببياض يبقىلا كده هى جاهزه للتزاوج ووضع البيض

الحاله النفسيه للانثى يعنى ممكن تكون الانثى مش مرتاحه فى المكان لكذا سبب ممكن لازعاجكم ليها كل شويه او مكان الجو فيه حر اوى فمسببلها ضيق
وبرضه الطيور غير بعضها فيه طيور بتاخد على المكان بسرعه وفيه طيور بتقلق من اى مكان جديد


ولو عندنا ذكر وانثى بادجى غير متوالفين وعايز نخليهم يتوالفوا اجبارى
هنعمل طريقه هتخليهم ان شاء الله يتوالفوا بسرعه


فيه 3 طرق للتوالف بسرعه

اول طريقه

نجيب الذكر فى قفص لوحده لمده اسبوع وبعدها ندخل عليه الانثى القفص اوقات الطريقه دى بتنفع مع مربيين واوقات لا
نجرب بقى وقتها الطريقه التانيه


تانى طريقه

نفصل الذكر والانثى كل واحد فى قفص بس يبقوا جمب بعض بحيث الذكر يبقى شايف الانثى وبعد اسبوع ندخل الانثى على الذكر فى قفصه مش العكس
ودى كمان طريقه بنتفع مع مربيين ومربيين تانين لا
لو دى كمان منجحتش ندخل على تالت طريقه والاخيره

ثالث طريقه

هنفصل الذكر والانثى برضه كل واحد فى قفص وجمب بعض لمده 3 ايام بس
الذكر هنحطله اكل كتييير جدا جدا جدا لحد والانثى طول اليومين الاولنيين هنحطلها اكل قليل ومن اول اليوم الثالث هنرفع الاكاله علشان نجوعها وبعدها هندخلها على الذكر فى قفصه هى هتبقى جعانه جدا وهو شبعان فى الاول اكيد برضه هيضربوا بعض بس من كتر جوعها هو هيحاول يأكلها والطريقه دى بتنجح مع كتيير جدا جدا
وان شاء الله يتم التزاوج ووضع البيض وتفرحوا بطيورهم الصغيره

اتمنى يكون موضوعى مفيد وقدرت افيدكم ولو بحاجه بسيطه
منقول