منتديات تو زوو - تجربتي في تربية دودة الألفية

السلام عليكم ورحمه الله وبركاته
انا نزلت موضوعين عن دوده الالفيه بس مش كاملات هذا موضوع يضم الموضوعين السابقين مع اضافات ف راح تكون الصور مكررة
معلومات عامه

دودة الالفيه من شعبة المفصليات تتكون من اقسام كل قسم يحتوي ع زوج من الاقدام عدا القسم الاول خلف الراس مافيه اقدام وبعد الاقسام الاولى يندمج كل قسمين مع بعض ف يصير كل قسم ( اللي هو عباره عن قسمين مندمجات) فيهن زوجين من الاقدام

مع ان اسمها الالفيه لكنها لاتمتلك ألف قدم... اكبر الانواع واطولها يمتلك 750 زوج من الاقدام والباقي معظمها تمتلك 360-400 زوج من الاقدام

لتمييز الجنس نركز ع القسم السابع يكون عديم الاقدام لانه يحتوي ع الاعضاء التناسليه الذكرية

ف الغالب تتكاثر هالديدان بكريا ف مابسهوله تحصل ذكور

انواعها كثيره بس النوع اللي حصلته هو (الألفيه الأفريقية العملاقة) لونها اسود او بني داكن واقدامها برتقاليه والبعض يعتقد انها عمياء لان عيونها مامبينه والصحيح ان فيها عيون بس لان لونها داكن ماتبين عيونها اللي هي عباره عن نقط سودا
وهي من اكبر الانواع

http://www.3rbz.com/uploads/4562cc51f36c1.jpg العاب بنات

ديدان الالفيه تعتبر من الديدان المسالمه لكن لها وسيله دفاع

عدا انها تتكور وهي افراز مادة كيمائيه سيانيد الهيدروجين ( ماعرف هل هي ف كل الانواع نفس الماده او لا) الماده تفرزها من غدد ع جوانب الجسم وريحتها مثل اليود بس نفااااااذه مثل الامونيا .. ع القفاز كان لون الماده اصفر وتصبغ الجلد بلون بنفسجي ومع اني كنت لابسه قفاز بس اللون جا ف صبعي وما شفت له اي اضرار عدا التصبغ وراح بعد ايام

http://www.3rbz.com/uploads/e44f438e70471.jpg العاب بنات

ومرات لما امسكهن بدون قفاز اذا خليت الماده فتره اطول زادت تركيز الصبغة ع الجلد اما لما امسحها ع طول تطلع اسرع

المهم

وبعدين نقلتهن لحوض زجاجي بس هالمره حطيت لهن سماد زراعي ونفس الصخور ورشيت بذر وقصيت دبه ماي صغيره من تحت وحرقت اطرافها عشان ماتجرحهن وحطيت فيها ماي عشان الشرب... ويوميا او كل يومين ارش الحوض بماي عشان الرطوبة لانهن يحتاجن رطوبه وفيهن مستشعرات رطوبه اساسا

http://www.3rbz.com/uploads/b046e53eecb41.jpg العاب بنات

واول وجبه كانت قطع مانجو واكلن ما شاء الله عليهن ونوعت لهن ف الاكل خضار وفواكه وكالسيوم مبشور وممكن تحطه ك قطع ( يحتاجن كالسيوم لانهن ينسلخن بين فترة وفترة لما يكبرن والكالسيوم اللي استخدمته عباره عن عظمه السيبيا اللي هي عظمه الحبار) وف الطبيعه هن يتغذن ع الاوراق الجافه و المتحلله

http://www.3rbz.com/uploads/32fb14fac9831.jpg العاب بنات

بس ماجالهن انسلخن عندي للحين

ومن طبيعتهن انهن ياخذن وقت ف التنظيف هذي صوره وحده تنظف نفسها::

http://www.3rbz.com/uploads/991ba11b3d011.jpg العاب بنات

الاكل ابدله بين فترة وفترة ... مع الرش بدت البذور تكبر وكان شكل الحوض جنان بس اخترب بعد فتره لان ديدان الالفيه يعتبرن حفارات ممتازات ويجلسن ف الجحور ايام

هذي صور البذور لما كبرت شوي:

http://www.3rbz.com/uploads/570a6d52bae01.jpg العاب بنات

صح اللي معي اناث ..

المهم قبل اسبوعين مرة شفت فيهن مثل الحشرات الصغيره بين الجسم والاقدام مثل النقط لونها بيج ف خفت عليهن وطلعت وحده منهن بسرعه والظاهر اني عورتها بغطا الحوض لان جسمها من ورا تكسر وتشقق وصار يطلع منها مثل الماي ع شكل قطرات كلما امسحهن يجي غيرهن ماعرفت ايش اسوي لها حاولت احط بلاستر مضاد للماء بس مامسك فيها والبلاستر الثاني او التيب الطبي ماحطيتهم لان قلت بيكون صعب اطلعهم بعدين ف ماسويت لها شي عدا اني حاول اوقفه بكلينكس ووقف الحمدلله

اما الحشرات الصغيره جبت مسحه طبيه معقمه ومسحتهن وطلعن والثانيه سويت لها نفس الشي بس الفرق بينهن ان المتعوره فرزت كميه قليله من الماده الكيميائيه عكس الثانيه انا قلت يمكن لانها ومتعورة ويمكن عشان الحجم بعد

المهم

ولما دورت ف النت عرفت ان الحشرات البيجيه تسمى عث الالفيه وانه شي عادي

ع العموم الكبيره راحت تحت ف النفق اما اللي تعورت جلست فوق وكانت تاكل عادي بس حركتها قلت ومعظم الوقت تكون ف صحن الماي صرت اعبيه يوميا لاني احصله مخلص ماعتقد انها تشربه كله بس ينطير لما تجلس ف الصحن يمكن كانت تحتاج رطوبه زياده

عالعموم حصلتها ميته امس اما الثانيه للحين تحت عادها ماعرفت اللي صار لصديقتها.....

وحاليا هي ف بيات من شهر يناير (1) 2016 وبين فترة وفتره ارطب الحوض
وان شاء الله اصحيها وقت الخريف
هالفترة بس اشيك عليها ت اتأكد اذا عادها حيه او لا
وصراحه من اروع الحشرات للتربيه اذا كان الشخص من كثيري السفر والانشغال والغياب

مايحتاجن متابعه يوميه للعلم هذي اول مرة اربيهن وماعرف هل طريقتي صحيحه او لا وسبب البيات هل هو نقص ف شي من المغذيات او لا