القصه ذى حصلت لى فى عام 2004 ميلادى.كنت انا وواحد من اصدقائي جالسين نسولف عندى بالبيت قلت له يابوفلان قال سم طال عمرك قلت ما ودك تكلم ولد عمتك يدور لنا رمادى زين نطقطق عليه.(ولد عمته عنده محل بالرياض) دق عليه وبعد السلام والكلام قاله ابى لى فرخين رمادي لى ولابوفيصل قاله مرادكم عندى بس ماهم فروخ كبار شوى.انا قلت اوكي ابى كبير علشان ادق خشمه واربيه صح.
المهم كم يوم ووصلت الطيور للدمام فرعهم هناك المحل الثانى لهم وطمر خويى وجابهم واعطانى واحد هديه بدون مقابل.

يوم وصول ناني:

طبعا انا سميتها ناني وكانت تتكلم وتقول يعقوب <<<< منهو يعقوب الله اعلم !

حطيتها عندى بالبيت وبديت بالترويض الا انها كانت عنيده جدا وشرسه الى ابعد الحدود وعدوانيه بقوه وكانت لو تقول لها السلام عليكم علي طول عضت.<<<من جد شرسه.
انا قلت فى نفسي ياولد هذى حلو خلي العيال ما يجونها ويشيلونها مثل باقى الطيور حاول ابو صبحي انه يتميلح معها وجته كم عضه وحتى ابوفادى ما قصرت معه.
المهم انى علمتها الكلام فقط حتى وصلت مرحله انى اقول لها الكلمه وخلال فقط 3 ايام تبدا بترديدها وبعدها انتقلت الى الجمل حتى بدت تقول سبحان الله الله كبر لا اله الا الله وبعدين علمتها انجليزى مثل اي لف يو و هلوا وهاي.

وعلمتها حركه لما تبي تطلع من القفص تدق بمنقارها على جدار القفص ثم تقول بصوت عالي فيصل افتح ولا تسكت لحد ما نفتح لها.

نرجع لصاحبنا وببغاءه:

الرجال انبسط مع طيره هو وعياله وكان اصغر من ناني وبدا يصفر ويطقطق وفى يوم من الايام زارته اخته من الرياض وهذى الاخت سبحان الله كانت عاقر اى ما تجيب اطفال رغم انها متزوجه من زمن طويل.
يوم شافت الطير تعلق قلبها فيه وطلبته من اخوها وقام وعطاها الطير.هي اخذت الطير وراحت به معها للرياض وهى لا تعرف شى عن الطيور ولا التربيه و ولكنها اعطته كل حنان وعطف الامومه وبدات تعطيه الاكل والماء وتنظفه وتتكلم معه وتخطط له كما لو كان هو طفلها ومع الوقت علمته على كلمة ماما وعاشت معه كما لو كان فعلا طفلها ومع الوقت استغنت عن القفص فقد اصبح الببغاء اليف جدا طبعا بعد محاولات منها لترويضه بالحب والحنان واشترت له الكثير من اللعاب ومن ضمنها صحن خاص به وملعقه ومن ثم بدات تحطهم على المائده الطعام وتقول له هذا مكانك وتحط له بعض الطعام وتناديه وكان يتردد وممتنع ولكن مع الوقت اصبح يجلس معهم على المائده وياكل معهم فاصبح فعلا طفل لها وعوضها الله عن الاطفال.

اما اخوها الى هو صديقى فجلس من دون طير ولكن اراد الله ان يرزقه لحسن صنيعه مع اخته فا
فى عام 2005 شهر 2 انولدت مس جوجو بنتي الغاليه وانشغلنا عن ناني
وبعد ما رجعت ام فيصل للبيت ومعها مس جوجو وكانت فى ذاك اليوم تبلغ من العمر فقط 5 ايام وفى صبحية ذاك اليوم كنت فاتح لنانى قبل اروح العمل وكانت فى المطبخ والمطبخ كان نظام امريكي يعنى مفتوح على باقى البت فنزلت الست نانى وراحت الى عرفه النساء الى موجوده فيها ام فيصل ومس جوجو نايمين وما تنبهت ام فيصل الا نانى واقفه قريب من راس جوجو وتتفرج على هالضيف الى اشغلنا عنها فجن جنون ام فيصل خوفا على بنتها من نانى الشرسه ومن شده الخوف ما عرفت تتصرف خصوصا انها كانت توها والده.
وبعد عدة محاولات ابعدت ناني عن البنت الصغيره ولكن ناني عيت ترجع لقفصها لحد ما جيت انا من العمل ورجعتها للقفص.
هنا ام فيصل اصرت ان هالطير ما يقعد بالبيت ولازم اصرفها باسرع وقت.قلت بس فرصه اعوض صديقى عن طيره الى راح قمت وشلت ناني وعطيتها اياه هديه.
طبعا هو فرح فيها بس اشتغلتهم عض الله لا يوريكم بس.

هذى قصه واقعيه حبيت انقلها لكم والمهم فيها تعامل السيده الفاضله مع الطير حتى اصبح مثل ابنها الذى لم ترزق به.


تقبلوا مودتى وفائق احترامي